ئەندامێكی لیژنەی دارایی لەپەرلەمانی عێراق رایگەیاند، گەر لەم مانگەدا ڕێككەوتنی هەرێم و بەغدا جێبەجێ نەكرێ، مانای وایە نیازی جێبەجێكردنیان نیە دەشڵێت “حكومەتی هەرێم دەبێت بێ بەغدایش بتوانێت موچەی فەرمانبەرانی دابین بكات.”
شێروان میرزا، ئەندامی لیژنەی دارایی لەپەرلەمانی عێراق بەدەنگی ئەمریكای راگەیاندوە، لە سەرەتای مانگی چوارەوە یاسای بودجە كەوتوەتە بواری جێبەجێكردنەوە، بەداخەوە تائێستا ئەوەی كە پەیوەندی بە هەرێمی كوردستانەوە هەیە جێبەجێ نەكراوە تەنانەت لە بەغدایش ئەوەی كە جێبەجێكراوە لە یاسای بودجە تەنها بریتییە لە موچە ئەگەرنا ئەوەی كە گرنگە وەكو پرۆژەكان بۆ پارێزگاكان هەتا ئێستا لەوێش جێبەجێ نەكراوە”.
ئاماژەی بەوەشكرد، لەئێستادا شاندێكی دیوانی چاودێری دارایی عێراق لە هەرێمن بۆ وردبینی كردن و پێداچونەوە بە داهاتی نانەوتی پێشبینی ئەوە دەكەین كە بۆ ئەم مانگە ڕێككەوتنەكە بچێتە بواری جێبەجێكردنەوە بەپێچەوانەوە ئەگەر ئەم مانگە جێبەجێ نەكرێت واتە نیازی جێبەجێكردنیان نییە ئەوكاتە دەبێت بەدواداچون بكەین بزانیین كەموكوڕی لەكام لایە ئایا كەموكوڕی لە هەرێمی كوردستاندایە یان لە بەغدایە.”
پەیوەست بە داهاتی حكومەتی هەرێم و دابینكردنی موچەش شیروان میرزا وتی، “بۆ مەسەلەی دابینكردنی موچە حكومەتی هەرێمی كوردستان هەرچی شتێكی كردبێت دەبێت بەبێ بەغدادیش بتوانێت موچەی موچەخۆرانی خۆی بدات، چیتر دۆخی ئەم لێبڕینی موچەیە بەردەوام نەبێت.”
