ئەندامێكی لیژنەی دارایی پەرلەمانی عێراق ڕایدەگەیەنێت حكومەتی عێراق لەوە دەترسێت تۆمەتبار بكرێت بەوەی بی بەرامبەر پارە بۆ هەرێمی كوردستان دەنێرێت.
جەمال كۆچەر، ئەندامی لیژنەی دارایی پەرلەمانی عێراق و سەرۆكی فراكسیۆنی یەكگرتوو لە چاوپێكەوتنێكی تەلەفزیۆنیدا رایگەیاند، ئەگەر سەرۆك وەزیرانی عێراق بڕیار بدات بەشە بودجە ڕەوانەی هەرێمی كوردستان بكرێت ئەوكات وەزیری دارایی ناچارە پارەكە خەرج بكات.
ئەوەشی خستەڕوو،ئەگەر مووچەی فەرمانبەران لە پشكی هەرێم جیابكرایەتەوە، وەكو مووچەخۆرانی عێراق، بودجە هەبووایە یان نا، مووچەی فەرمانبەران هەر رەوانە دەكرا، بەڵام هەرێمی كوردستان قبووڵی نەكرد و داوایكرد هەمووی یەك پاكێج بێت”.
وتیشی،” ئەگەر وەزیری دارایی عێراق رێگربێت لە ناردنی بودجە و پشكی هەرێمی كوردستان، نابێت حكومەتی هەرێم وا بێدەنگ بێت و وەزیرێك بتوانێت خەڵكی هەرێمی كوردستان برسی بكات، بۆیە دەبێت كورد چ ئەوانەی لە حكومەتن و چ ئەوانەی لە پەرلەمانن، هەڵوێست وەربگرن”.
جەمال كۆچەر ئەوەشی ئاشكراكردووە،”لە یەكێك لە دانیشتنەكاندا كاتێك لایەنە شیعییەكان داوای رادەستكردنی دۆسیەی نەوتیان كردووە، محەمەد حەلبووسی لەو دانیشتنەدا وتی كامێرەكان بكوژێننەوە با بە راشكاوی پێتان بڵێم، وتی هەر كاتێك نرخی نەوت بگاتە 65 دۆلار ئەوا كورد لە بەغدا نابیننەوە”.
روونیشیكردووەتەوە،” هەردوو حكومەت جیددی نین، هاووڵاتییانیش لەنێوان هەردوو حكومەتدا بوونەتە قوربانی”.
