پۆلیسی گەرمیان رایگه‌یاند، لەسەر بڵاوكردنەوەی گرتەیەكی ڤیدیۆیی لەتیك تۆك شەش گەنجیان دەستگیر كردوه.
عەلی جەمال قەدوری، وتەبێژی پۆلیسی گەرمیان لە ڕاگەیەنراوێكدا ئاماژه‌ی به‌وه‌كردوه، “دوای بڵاوبوونەوەی ڤیدیۆیەك لە تۆڕی كۆمەڵایەتی تیكتۆك، كە تێیدا چەند گەنجێك لەگەڕەكی ئاوارەكانی شارۆچكەی كەلار لەماركێتێك سوكایەتی بەگەنجێك دەكەن و ئازاری دەدەن، شەش كەس دەستگیركران”.
وتەبێژی پۆلیسی گەرمیان وتیشی: “دوای سكاڵای گەنجەكە پۆلیسی كەلاری كۆن شەش گەنجیان دەستگیركرد و دوای لێكۆڵینەوە لەگەڵیان دانیان ناوە بەوەدا كە سوكایەتیان بەسكاڵاكار كردوە”.
ئەوەشی خستۆته‌ڕوو، “لەئێستادا بەبڕیاری دادوەر هەر شەشیان بەپێی ماددەی 2ی خراپ بەكارهێنانی مۆبایل بەندكراون”.
