وەزارەتی تەندروستی هەرێمی كوردستان بڵاویكردەوە، پشكنینی كۆرۆنا لە دەروازەكان ئەو كەسانە ناگرێتەوە كە كەمتر لە 48 كاتژمێر پشكنینیان كردووە و ئەوانەشی بڕوانامەی وەرگرتنی هەردوو ژەمە ڤاكسینەكەیان هەیە.
ئاسۆ حەوێزی وتەبێژی وەزارەتی تەندروستی لە راگەیەندراوێكدا ئاماژەی بەوەداوە، هەروەك پێشتر رامانگەیاندبوو بۆ پێداچوونەوە بە رێكارەكان و گونجاندنی لەگەڵ هەلومەرج و بارودۆخی ئێستای كۆرۆنا بڕیاردرا بە وەرگرتنی نمونە و پشكنینی ڤایرۆسی كۆرۆنا لەدەروازە سنوریەكان و فرۆكەخانەكان بۆ ئەو هاووڵاتیانەی دەگەڕێنەوە.
رونیشیكردووەتەوە، ئەو هاوڵاتیانەی دەرەنجامی پشكنینی ڤایرۆسی كۆرۆنای پشتڕاستكراو و باوەڕپێكراوی هەبێت كەمتربێت لە 48 كاتژمێر، لەكاتی گەیشتن پێویست بە وەرگرتنی نمونەی پشكنین ناكات.
بەپێی راگەیەندراوەكە، هەروەها ئەو هاوڵاتیانەی بڕوانامەی وەرگرتنی دوو ژەمی ڤاكسینی دژە ڤایرۆسی كۆرۆنای پشتڕاستكراو و باوەڕپێكراوی هەبێت پێویست بە وەرگرتنی نمونەی پشكنین ناكات.