جێگری سەرۆكی حكومەتی هەرێمی كوردستان ڕ‌ایدەگەیەنێت، لەدوای قەیرانی داراییەوە بۆیان دەركەوتووە شێوازی حكومڕانی هەرێم دواكەوتوو بووە، دەشڵێت: بایۆمەتری كێشەی بن دیوار و دوو مووچەیی چارەسەر دەكات.
قوباد تاڵەبانی جێگری سەرۆكی حكومەتی هەرێمی كوردستان لە دیبەتێكدا لە پێشانگای نێودەوڵەتی تەكنۆلۆژی های تێكس لە شاری هەولێر ڕ‌ایگەیاند: لە ساڵی 2015 وە ڕ‌ووبەڕ‌ووی قەیرانی دارایی بوینەتەوە و بۆمان دەركەوت كە شێوازی حوكمڕ‌انی دواكەوتوو بووە و حكومەت بۆ خەڵك دروستكراوە و یاسا كۆنەكان بوونەتە بەربەست لەبەردەم حكومەت و هەوڵدەدین بەسەر بەربەستەكاندا سەربكەوین و دەبێت خۆمان لەگەڵ ململانێ نوێیەكاندا بگونجێنین و دەبێت حوكمڕ‌انی لە هەرێم باشتر بكەین.
سەبارەت بە سیستەمی بایۆمەتری وتیشی: بایۆمەتری كێشەی بن دیوار و دوو مووچەیی چارەسەر دەكات و 475 هەزار ژمارەی بێهاوتا بۆ مووچەخۆران دابەش دەكەین و پێشتر نەماندەزانی مووچە بە كێ دەدەین و وەزارەتی دارایی دەستیكردووە بە دروستكردنی هەژماری بانكی بۆ فەرمانبەران، جەختیشی كردەوە: “ژمارەی بێهاوتا كێشەی دوو ناوی و سێ ناوی و بندیوار ناهێڵێت”.
سەبارەت بە ئەلكترۆنیكردنی حكومەتیش وتی: سەردەمی نووسراو و قەڵەم بەسەرچووە پرۆسەی تۆماركردنی كۆمپانیاكان خێراتر دەكەین و ئەلكترۆنیكردنی دامودەزگاكانی حكومەت لەمێژ ساڵە دەستپێكردووە و كەرتی تایبەت هاوكار بووە بەرەو حكومڕ‌انییەكی دیجیتاڵی.
