وتەبێژی هاوپەیمانی فەتح دەڵێت: پێویستە دامەزراوە سەربازییەكان و حەشدی شەعبی لە ململانێ سیاسییەكان دووربخرێنەوە، دەشڵێت بە هۆی گوێنەگرتن بۆ مەرجەعیەت خۆپیشاندان و ناڕەزایەتیەكان سەریانهەڵداوە.
ئەحمەد ئەسەدی، سەرۆكی گردبونەوەی سەنەدی نیشتیمانی و وتەبێژی هاوپەیمانی فەتح رایگەیاند، مەرجەعیەتی باڵا لەنەجەف چەندینجار هۆشداریداوە لە بونی كێشە و گرفتی بەرچاو لەدامەزراوەی دەوڵەتی عێراق و پێویستی چاكسازی و چاككردنەوەی هەڵەكان، بۆیە بەپێویستی دەزانن دامەرزاوەی سەربازی و حەشدی شەعبی لەناكۆكی و ململانێ سیاسییەكان دوربخرێنەوە.
ئاماژەی بەوەشكردوە، مەرجەعیەتی باڵا لەنەجەف لەسەرجەم ئامۆژگارییەكانیدا بۆ سیاسییەكانی وڵات باسی لە بونی كێشەی گەورە و رون لە دەوڵەت، نەبونی پێداویستییە سەرەتاییەكان بۆ هاوڵاتیان، داوای چاكسازی و چاككردنەوەی هەڵەكانی كردوە، بەهۆی گوێ نەگرتنیش لەئامۆژگارییەكان خۆپیشاندان و ناڕەزاییەكان سەریان هەڵدا.
لە ماوەكانی رابردوودا چەندین جار داواكراوە حەشدی شەعبی و هێزە ئەمنی و سەربازییەكان لە كایەی سیاسی دووربخرێنەوە و بە تەواوەتیش بكەونە ژێر فەرمانی فەرماندەی گشتیی هێزە چەكدارەكان.