جێگری سەرۆكی پەرلەمانی عێراق دەڵێت، تاوەكو كۆتایی ئەو مانگە بەغدا 200 ملیار دینارەكە بۆ هەرێمی كوردستان دەنێرێت باس لەوەشدەكات هەندێك لایەن بۆ موزایەدە و لە پیچناو بانگەشەی هەڵبژاردندا دژایەتی ناردنی ئەو پارەیە دەكەن.
بەشیر حەداد، جێگری سەرۆكی پەرلەمانی عێراق لە كۆنگرەیەكی رۆژنامەوانیدا رایگەیاند، “لیژنەی تەكنیكی بەغدا لە هەرێمی كوردستان كاری وردبینی دەكەن و تاوەكو تەواوبوونی كارەكانیان بەغدا بڕیاریداوە 200 ملیار دینار بنێرێت، پێشبینی دەكەین پێش كۆتایی ئەم مانگە ئەو پارەیە بگاتە هەرێمی كوردستان”.
لەبارەی ئاستەنگی بەردەم ناردنی پارەكەش، بەشیر حەداد وتی: “ئەوانەی ئاستەنگ دروست دەكەن چەند لایەنێكن دژی هەرێمی كوردستان و عێراق ئەو كارە دەكەن و بۆ كۆكردنەوەی دەنگی خەڵك و بانگەشە بۆ هەڵبژاردنەكان وەكو موزایەدەیەكی سیاسی ئاستەنگ بۆ ناردنی پارەكە دروست دەكەن”.
لە ناوەڕاستی ئەم مانگەدا حكومەتی عێراق بڕیاریدا وەك سولفەیەك بڕی 200 ملیار دیناری مانگانە رەوانەی هەرێم بكات و ئەویش دوای وردبینیكردن لە داهاتە نانەوتییەكانی هەرێمی كوردستان.
