وەزارەتی تەندروستی عێراق ئاشكرایكرد، شەپۆلی سێیەمی پەتای كۆرۆنا لە عێراق دەستی پێكردووە و هۆشداریش دەدات لە مەترسی شەپۆلە نوێكە.
سەیف بەدر، وتەبێژی وەزارەتی تەندروستی عێراق بە ئاژانسی هەواڵی فەرمی عێراقییەی راگەیاندووە، شەپۆلی سێیەمی پەتای كۆرۆنا لە وڵاتدا دەستی پێكردووە، شەپۆلەكە بەهێزتر و مەترسیدارترە لە دوو شەپۆلەكەی پێشوو، پێویستی بە تەركیز خستنە سەر رێگەكانی خۆپاراستنە بۆ كۆنترۆڵكردنی، گرنگترینیشیان بەستی كەمامە و وەرگرتنی ڤاكسینە.
رونیشیكردووەتەوە، دەستكراوە بە جێبەجێكردنی پلانێكی فراوان بۆ زیادكردنی ژمارەی ڤاكسینەكان لە بەغدا و پارێزگاكانی تر، داواش لە سەرجەم دەزگاكانی راگەیاند و تۆڕە كۆمەڵایەتییەكان دەكەن دەستبكەن بە بڵاوكردنەوەی هۆشیاری تەندروستی و پشت بە سەرچاوەی زانستی متمانە پێكراو ببەستن بۆ گەیاندنی زانیاری.
وتەبێژی وەزارەتی تەندروستی عێراق جەختیلەوەشكردووەتەوە، رۆڵی سەركردە ئایینی و عەشایەری و كۆمەڵاییەكان و كەسایەتییە گشتیەكانیش گرنگە بۆ هۆشیاركردنەوەی تەندروستی و خۆپاراستن و بانگەواز بۆ وەرگرتنی ڤاكسین بەتایبەتی بۆ ئەو چینانەی مەترسییان لەسەرە.
