قوباد تاڵەبانی جێگری سەرۆك وەزیران چاوی كەوت بە خاتوو پاولا کانلی، باڵیۆزی ئوسترالیا لە عێراق و، پێكەوە ژمارەیەك پرسی جێگە بایەخی هەردوولایان تاوتوێ كرد.
لە كۆبوونەوەکەدا ئەمڕۆ ( 29 ی حوزەیرانی 2021) هەردوولا لەبارەی دۆخی ئەمنی عێراق و مەترسی سەرهەڵدانەوەی داعش گفتوگۆیان كرد، پێكەوە هاوڕابوون لە پێویستی هەماهەنگی زیاتری نێوان هەرێمی کوردستان و حکومەتی فیدرال و هاوپەیمانێتی نێودەوڵەتی دژی داعش بۆ بەرەنگاربوونەوەی مەترسییەكانی ئەم ڕێكخراوە و دیاردەی تیرۆر بەگشتی.
سەبارەت بە پرسی هەڵبژاردنە چاوەڕوانكراوەكەی عێراقیش، جێگری سەرۆك وەزیران و شاندەکەی ئوسترالیا جەختیان كردەوە، لەسەر بەڕێوەچوونی هەڵبژاردن لەوادەی دیاریكراوی خۆیدا لە 10 تشرینی یەكەمی داهاتوو، بە شێوەیەكی ئازاد و بێگەرد بۆ ئەوەی ببێتە بنەمایەکی بەهێز بۆ پێکهێنانی حكومەتی داهاتوو لە عێراق.
لە بەشێكیتری كۆبوونەوەكەدا باسی چاكسازی و هەوڵەكانی بنەبڕكردنی گەندەڵی لە هەرێمی كوردستان كرا، لەم میانەیەشدا قوباد تاڵەبانی داوایكرد ئوسترالیا زیاتر هاوكار بێت لەپەرەپێدانی كشتوكاڵ و بەڕێوەبردنی سەرچاوەكانی ئاو لە كوردستان و ڕوونیكردەوە بەرنامەی حكومەتی هەرێم ئەوەیە كشتوكاڵ ببێتە سەرچاوەیەكی گرنگی داهات و ئابووری هەرێمی کوردستان.
