دۆناڵد ترامپ سەرۆكی پێشووی ئەمریكا، رایگەیاند، بەهۆی سانسۆر و سڕینەوەی هەژمار و بابەتەكانی سكاڵا لەسەر كۆمپانیاكانی گوگڵ، تویتەر و فەیسبوك تۆمار دەكات.
دۆناڵد ترامپ لە یانەی گۆڵف لە شاری نیوجێرسی، لێدوانێكی سەبارەت بەو دۆسیەیە دا و باسی لەوەكرد: ئەمە پێشهاتێكی زۆر گرنگە و لە پێناو ئازادی رادەربڕین دامەزراوە گەورەكانی تەكنەلۆجیا وەك فەیسبووك، گووگڵ، تویتەر دەدەمە دادگا.
وتیشی: پێویستە كۆتایی بە سانسۆر، كپ كردنی دەنگ و بیر و رای جیاواز بهێنرێت و چیتر كەس نەخرێتە لیستی رەشەوە.
ترامپ راشیگەیاند، ئەگەر ئەو سێ كۆمپانیایە بتوانن چالاكیەكانی سەرۆكی وڵاتێك رابگرن، بەرامبەر بە هەر كەسێكی دیكەش دەتوانن ئەو كارە بكەن.
لەماوەی هەڵمەتی هەڵبژاردنی سەرۆكایەتی ئەمریكادا تۆڕە كۆمەڵایەتیەكان چەند جارێك بڵاوكراوە و تویتەكانی دۆناڵد ترامپیان هەڵپەسارد و دوای هێرشی لایەنگرانیشی بۆ سەر بینای كۆنگرێس لەسەرەتای ئەمساڵ بە یەكجاری هەژمارەكانی ناوبراویان داخست.
