مەلا بەختیار، ئەندامی ئەنجومەنی باڵای سیاسی و بەرژەوەندییەكانی یەكێتیی نیشتمانیی كوردستان رەتیدەكاتەوە لەگەڵ مەسعود بارزانی، سەرۆكی پارتیدا “رێككەوتبێت بۆ دروستكردنی كێشە” لەناو حزبەكەی. دەشڵێت: لە دیدارەكەیاندا قسەیان لە سەر چارەسەركردنی ناكۆكییەكانی نێوان یەكێتی و پارتی كردوە بە چارەسەركردنی گرفتەكان لەگەڵ لاهور شێخ جەنگی، هاوسەرۆكی یەكێتیش.
مەلا بەختیار، لە رونكردنەوەیەكدا باسی لەوەكردووە”لە یەك دو سایت و پەیجدا، درۆیەكی شاخدار بڵاوكراوەتەوە، گوایە، (بەندە_ مەلا بەختیار) لە دیداری بەرێز مەسعود بارزانی دا، بۆ دروستكردنی كێشە لە ناو یەكێتیدا، رێككەوتوم.”
مەلا بەختیار وتویەتی”هەرگیز قسەی وا لە دیدارماندا، نەهاتۆتە ئاراوە، بەڵكو بە پێچەوانەوە، قسەمان لەسەر رونەدانی شەر لەگەڵ پەكەكە، چارەسەركردنی ناكۆكییەكانی نێوان یەكێتی و پارتی كردوە، بە چارەسەركردنی گرفتەكان لەگەڵ بەڕێز لاهور شێخ جەنگیش.”
ئەو ئەندامەی ئەنجومەنی باڵای سیاسی و بەرژەوەندییەكانی یەكێتی ئەوەشی خستۆتەڕو”هەروەها، جەخت كراوەتەوە كە پێویستە كۆنگرەیەكی كوردستانی لە هەرێمدا سازبدرێ، بۆ ئەوەی هەمو لایەك، پێكەوە، لایەنەكانی دەسەڵات و بەرهەڵستكارو پسپۆرو رێكخراوە مەدەنییەكان، رێگە چارەسەری دۆخەكە بدۆزنەوە.”
