رۆژنامەیەكی بەرتیانی هۆشداری لە هەڵگیرسانی جەنگی جیهانی سێیەم دەدات، ئەوەش بەهۆی ئەگەری پێكدادانی روسیا لەگەڵ هاوپەیمانی باكوری ئەتڵەسی ناسراو بە “ناتۆ”.
رۆژنامەی زە سەنی بەریتانی لە راپۆرتێكدا بڵاویكردووەتەوە، سێ ژێر دەریایی ئەتۆمی رووسی هاتوونەتە دەریای بەلتیك، ئەوەش لەكاتێكدایە هاوپەیمانی ناتۆ لەو ناوچەیە مانۆڕی سەربازی ئەنجام دەدەن و كەشتییەكی ئەمریكیش لە چوارچێوەی مانۆڕەكەدا لە دەریای رەشدایە.
رۆژنامەكە رونیشیكردووەتەوە، ئەوە مەترسییەكانی هەڵگیرساندنی جەنگی جیهانی سێیەمی دروستكردووە، هەروەها یەكەمجارە سێ ژێردەریایی روسی لەو ناوچەیە بە یەكەوە دەربكەون، بەوەش ئەو وڵاتە هێزی خۆی پیشان دەدات.
رۆژنامەكە ئاشكراشیكردووە، پێش چەند رۆژێكیش بەلەمێكی جەنگی روسی هۆشداری دابووە كەشتیەكی جەنگی بەریتانی بەوەی كە رێچكەكەی بگۆڕێت ئەگەرنا ئەوا تەقەی لێدەكەن، چەندین جاریش هێزەكانی روسیا تەقەیان كردووە و دوای بینینی فڕۆكەیەكی سیخوڕی ئەمریكی، چەند فڕۆكەیەكی جەنگی ناردووەتە ناوچەكە.
32 دەوڵەتی هاوپەیمانی ناتۆ لە ناویاندا ولایەتە یەكگرتووەكانی ئەمریكا سەرقاڵی مانۆڕی سەربازین لە دەریای رەشدا و پێشتریش روسیا هۆشداری دابوو لەوەی كە مانۆڕەكە گرژییەكان زیاتر دەكات.
