وتەبێژی پارتی دیموكراتی كوردستان سەبارەت بە گرژییەكانی رۆژانی رابردووی ناوخۆی یەكێتی وتی: هیوادارین كێشەكان لە بەرژەوەندی هاوڵاتیان و سەقامگیری هەرێمی كوردستان و دەڤەری سلێمانی چارەسەر بكرێن.
مەحمود محەمەد وتەبێژی پارتی لە روونكردنەوەیەكدا رایگەیاند: ڕوداوەكانی ئەم چەند رۆژەی دەڤەری سلێمانی، كە بووە هۆی دروستبوونی گرژی و بارودۆخێكی ناھەموار و، دڵەڕاوكێ و نیگەرانی هاووڵاتیانی ناو شاری سلێمانی و دەڤەرەكەی بەگشتی بەدوای خۆیدا هێناوە، بابەتێكە پەیوەندیی بە ناوخۆی یەكێتییەوە هەیە.
راشیگەیاندووە، هیوادارین چارەسەرییەكەی (ئەو دۆخە) لە بەرژەوەندیی هاووڵاتیان و سەقامگیریی هەرێمی كوردستان بەگشتی و دەڤەری سلێمانی بەتایبەتی بێت، بەشێوەیەك كە نیگەرانی و دڵەڕاوكێی جەماوەرە خۆشەویستەكەی بڕەوێنێتەوە.
لە رۆژانی رابردوودا بە هۆی گۆڕانكاری لە چەند پۆستێكی ئەمنی گرژی و ناكۆكی لە نێوان هاوسەرۆكانی یەكێتی دروست بووە و چەند هەوڵێكیش بۆ كۆتاییهێنان بەو ناكۆكیە خراونەتەگەڕ.
