نوێترین هەواڵ

ئەنجومەنی پارێزگای سلێمانی: دەبێت هاوسەنگی لە نێوان موچە و دەوامی فەرمانبەراندا هەبێت

سەرۆكی ئەنجومەنی پارێزگای سلێمانی رایگەیاند، بۆ یەكەمجار بودجەی پەرەپێدانی پارێزگاكان بە ژمارە هاتوەتە ئەنجومەنی پارێزگا  و دەشڵێت، لە كۆبوونەوەكەیاندا “بەكۆی دەنگی ئەندامانی ئەنجومەن داوای كۆتاییهێنانیان بە لێبڕینی موچە كردووە و هاوسەنگی لە نێوان موچە و دەوامی فەرمانبەراندا هەبێت”.
ئازاد حەمەئەمین، سەرۆكی ئەنجومەنی پارێزگای سلێمانی ئەمڕۆ لەمیانی كۆنگرەیەكی رۆژنامەوانیدا رایگەیاند، “لەو ماوەی كە دەستبەكاربوین لە 24-6-2014ەوە تا ئێستا بۆ یەكەمجار بودجەی پەرەپێدانی پارێزگاكان بە ژمارە هاتوەتە ئەنجومەنی پارێزگای سلێمانی، ئەو بودجەیە هاتوە پشكی سلێمانی، ئیدارەی راپەڕین و ئیدارەی گەرمیان بەجیایە، وەزارەتی پلاندانان بەپێی ژمارەی دانیشتوان دابەشی كردوە و ئەو بودجەیەیە كە لە بودجەی 2021ی دیاریكراوە”.
ئاماژەی بەوەشكرد، ئەو بودجەیەی بۆ سلێمانی تەرخانكراوە بریتییە لە 65 ملیار و  682 ملیۆن دینار، بۆ ئیدارەی راپەڕین بریتییە لە 16 ملیار و 974 ملیۆن دینار، بۆ ئیدارەی گەرمیانیش بریتییە لە 12 ملیار و 546ملیۆن دینارە.
بڕگەیەكی دیكەی كۆبونەوەكەی ئەنجومەنی پارێزگای سلێمانی تایبەت بو بە گفتوگۆكردن لەسەر دەوامی فەرمانبەران و لێبڕینی موچە و لەو بارەوە ئازاد حەمەئەمین رایگەیاند، ” تەواوی ئەندامانی ئەنجومەن كۆكبون لەسەر ئەوەی پێویستە لێبڕینی موچە كۆتایی پێبهێنرێت، وە ئەو بڕیارەشی كە ئێمە دامان ناچارین بەشێوەی پێشنیاز بینێرین بۆ ئەنجومەنی وەزیران چونكە ئەنجومەنی وەزیران بڕیارەكانی دەركردوە و ئیدارە سەربەخۆكان گشتاندیان پێكردوە”.
ئەوەشی خستەڕو، “ئێمە وەكو ئەنجومەنی پارێزگای سلێمانی لەگەڵ ئەوەداین كۆتایی بە لێبڕینی موچە بێت و هاوسەنگی لەنێوان دەوامی فەرمانبەران و موچەدا دروستبكرێت، ئەو هاوسەنگیەش بە پێدانی موچە و ئاساییكردنەوەی شایستە داراییەكانی موچەخۆرانی كوردستان دەبێت بەرامبەر بەو ئەركەی لەسەریانە، لە هەمانكاندا دەبێت رەچاوی بارودۆخی تەندروستی پارێزگای سلێمانی بكرێت، پێشنیارەكەشمان رەوانەی ئەنجومەنی وەزیران دەكرێت و بێگومان نوسراوێكیش ئاڕاستەی پەرلەمان دەكرێت”.

هەواڵی دواتر

مستەفا کازمی هەڵوێستی خۆی لەبارەی رەتکردنەوەی پرۆژە یاسای ئاسایشی خۆراک راگەیاند

لەیەکەم هەڵویستی دژی بڕیارەکەی دادگای فیدڕاڵی بە رەتکردنەوەی پرۆژە یاسای ئاسایشی خۆراک، مستەفا کازمی سەرۆک …

وەڵامێک بنووسە

پۆستی ئەلکترۆنیکەت بڵاو ناکرێتەوە .