هاوپەیمانیی نێودەوڵەتی دژبە داعش رایگەیاند، كە هاریكاریی نێوان هێزە عێراقییەكان و پێشمەرگە گرنگە بە ئامانجی بەرگرتن لە دووبارە گەڕانەوەی داعش.
لەمبارەیەوە واین مارۆتۆ وتەبێژی هاوپەیمانیی نێودەوڵەتی دژبە داعش، لە هەژماری تایبەتی خۆی لە تۆڕی كۆمەڵایەتیی تویتەر نووسیوویەتی “هاریكارییەكانمان لە ئەركی شكستپێهێنانی داعش بەردەوامە لەگەڵ ھاوبەشەكانمان لە هێزە عێراقییەكان و پێشمەرگە”.
راشیگەیاندووە “هاریكاریی نێوان هێزە عێراقییەكان و پێشمەرگە گرنگە بە ئامانجی بەرگرتن لە دووبارە گەڕانەوەی داعش”.
واین مارۆتۆ هەروەها نووسیوویەتی “پڕۆگرامی ئەمریكا بۆ پشتیوانی مەشق و پڕچەككردن بە ئامانجی بەرەنگاربوونەوەی داعش كە لە ساڵی 2014ەوە لەژێر سەرپەرشتی هاوپەیمانیی نێودەوڵەتی دژبە داعش جێبەجێ دەكرێت، زۆر گرنگە بۆ سەركەوتنی ئەركەكانمان و پاراستنی هاوبەشیی و هاریكارییەكانمان”.
ئەمەیش دوای ئەوە دێت، رۆژی سێشەممە وەزارەتی پێشمەرگەی هەرێمی كوردستان رایگەیاندبوو كە هاوكاریی دیكەی سەربازی لەلایەن ھاوپەیمانیی نێودەوڵەتی دژبە داعش پێشكەش بە هێزەكانی پێشمەرگە كراوە كە پێكهاتووە لە ژمارەیەك تانكەر و ئۆتۆمبێل و كەرەستە و كەلوپەلی لۆجستی سەربازیی.
