ژمارەی قوربانیانی كۆچبەران لە رێگەی بەرەو ئەوروپا بووە بە دوو هێندە

رێكخراوی كۆچی نێودەوڵەتی ئاشكرای كرد، ژمارەی ئەو كەسانەی لە دەریاكاندا و لە هەوڵی گەیشتن بە وڵاتانی ئەوروپا گیانیان لەدەستداوە زیادی كردووە و لە نیوەی یەكەمی ئەمساڵدا گەیشتووەتە سەرووی هەزار و 100 كەس.
رێكخراوی كۆچی نێودەوڵەتی لە راپۆرتێكدا بڵاویكردووەتەوە، لە نیوەی یەكەمی ساڵی 2021دا ژمارەی ئەو كەسانەی لە دەریاكاندا و لەكاتی هەوڵدان بۆ گەیشتن بە ئەوروپا گیانیان لەدەستداوە گەیشتووەتە هەزار و 146 كەس.
رونیشكراوەتەوە، ئەوەش دوو هێندە زیاتری ئەو ژمارەیەیە لە هەمان كاتی ساڵی پێشتردا گیانیان لەدەستداوە كە 513 كەس بووە، هەروەها لە هەمان كاتی ساڵی 2019دا ژمارەكە 674 كەس بووە.
رێكخراوەكە جەختیلەوەشكردووەتەوە، رێكخراوە مەدەنییە رزگاركەرەكان بەردەوامن لە هەوڵەكانیان ئەوەش سەرەڕای رێگرییەكان و دەست بەسەردا گرتنی بەلەم و كەشتی و تیمەكانیان لە كەنارەكانی ئەوروپا.