رابەری بزوتنەوەی تالیبان دەڵێت، ئامانجیان جێگیركردنی سیستمێكی ئیسلامیە لە ئەفغانستان و باس لەوەشدەكات، كە لەگەڵ چارەسەری سیاسیدان بۆ تێپەڕاندنی قەیرانی وڵاتەكەی.
مەلا هەبەتوڵا ئاخوندزادە رابەری بزوتنەوەی تالیبان لە پەیامێكدا بە بۆنەی جەژنی قوربان رایگەیاندوە: سەرەڕای ئەو سەركەوتنە سەربازیانەی لە ماوەكانی رابردوودا تۆماریان كردوە، بەڵام لەگەڵ ئەوەدان قەیرانی ئەفغانستان لە رێگەی سیاسیەوە چارەسەر بكەن.
باسی لەوەشكردووە: پابەندن بە گفتوگۆوە و شاندی بزوتنەوەكەشیان لە قەتەر سەرپشك كردووە بۆ ئەوەی لەگەڵ حكومەتی ئەفغانستان بگەنە رێكەوتنێك بۆ راگەیاندنی ئاگربەست و كۆتاییهێنان بە شەڕ.
لەهەمان كاتدا رابەری تالیبان رەخنەی لە شاندی حوكمەتی ئەفغانستان گرتووە، لە دانوستانەكانی قەتەر و رایگەیاندوە: یاری بە كاتەوە دەكەن.
هەبەتوڵا ئاخوندزادە لە بەشێكی دیكەی پەیامەكەیدا رایگەیاندوە، ئامانجی سەرەكی تالیبان دامەزراندنی سیستەمێكی ئیسلامیی لە ئەفغانستان و گەڕاندنەوەی ئاشتی و ئارامییە بۆ وڵاتەكەیان.
هەروەها وڵاتانی دراوسێی ئەفغانستانیشی دڵنیا كردوەتەوە، كە بزوتنەوەی تالیبان نابێتە مەترسی بۆ سەر ئەو وڵاتانە.
لە رۆژانی رابردوودا پێشڕەوییەكانی تالیبان خێراتر بووە و دەستیان بەسەر چەندین شار و شارۆچكە و دەروازەی سنورییدا گرتووە.
هاوكات لەگەڵ ئەو دۆخە دانوستانەكانی نێوان حكومەتی ئەفغانستان و بزوتنەوەی تالیبان لە دەوحەی قەتەر بەمەبەستی راگەیاندنی ئاگربەست بەردەوامە.