وتەبێژی وەزارەتی تەندروستی حكومەتی هەرێمی كوردستان دەڵێت: رێژەی تووشبوون بە كۆرۆنا بۆ سێ هێندە زیادیكردووە و پێشبینی دەكەن لە رۆژانی داهاتوودا رۆژانە هەزاران تووشبوو تۆمار بكرێن.
ئاسۆ حەوێزی، وتەبێژی وەزارەتی تەندروستی حكومەتی هەرێمی كوردستان رایگەیاند: “رێژەی توشبوون بە كۆرۆنا سێ هێندە زیادی كردووە بە بەراورد لەگەڵ چەند هەفتەیەك بەر لە ئێستا، ئامارەكان ترسناكە و پێشبینی هەزاران توشبووی رۆژانە دەكرێ لە داهاتوو”.
باسی لەوەشكردووە، ئەوەی كە بەدی دەكرێ سستبوونێكی تەواوە بە پابەندبوون بە رێكارەكانی خۆپارێزی لە هەموو شوێنەكان، ئەگەر بەریەككەوتن كەم نەكەینەوە ئەوا كارەسات بەڕێوەیە.
وتەبێژی وەزارەتی تەندروستی جەختیشی كردوەتەوە، كە هەرێمی كوردستان بەدەر نییە لە وڵاتانی دەورەبەر كە چۆن بەهۆی دۆخی كۆڕۆناوە دەناڵێنن، لەو رووەشەوە داوای كردووە هاوڵاتیان پابەندی رێنماییە خۆپارێزییەكان بن و قەرەباڵغی كەمبكەنەوە.
