سەرۆك وەزیرانی عێراق رایگەیاند، زۆرینەی كارەكانی پرۆژەی بەستنەوەی كارەبای نیشتیمانی عێراق بە تۆڕی كارەبای كەنداو تەواوبوە.
مستەفا كازمی، سەرۆك وەزیرانی عێراق لەلێدوانێكدا رایگەیاندووە، لەئێستادا كاردەكەن لەسەر تەواوكردنی پرۆژەی بەستنەوەی كارەبای نیشتیمانی عێراق بە تۆڕی كارەبای كەنداو و لەم كاتەدا 85% پرۆژە تەواو بوە، هەروەها لەئێستادا ئاسایشی زیاتر بۆ تاوەرەكانی كارەبا دابین كراوە و ئەوەش هاوكارێكی باش دەبێت لەرێكخستنەوەی پێدانی كارەبا بەهاوڵاتیان.
هەر سەبارەت بەم بابەتە ئەحمەد عەبادی، وتەبێژی وەزارەتی كارەبای عێراق راگەیاندوە، بڕیارە پرۆژەی بەستنەوەی تۆڕی كارەبای نیشتمانیی وڵاتەكە بە تۆڕی كارەبای وڵاتانی كەنداو لە وەرزی هاوینی ساڵی 2022 دا تەواوبێت، روونیشیكردوەتەوە، لەبەشی عێراق 80%ـی پرۆژە تەواو بوە و لە بەشی كەنداویش كاركردن لە پرۆژەكە بەردەوامە.
لە پاڵ پرۆژەی بەستنەوەی تۆڕی كارەبای نیشتمانیی عێراق بە تۆڕی كارەبای كەنداو، عێراق بەردەوامە لە بەستنەوەی تۆڕی كارەبای نیشتمانیی خۆی بە تۆڕی كارەبای ئوردن و میسر.
