سەركردەیەكی یەكێتی: گۆڕینی سەرۆكی لیستی هاوپەیمانی كوردستان زیانی بۆ ئەنجامەكانی هەڵبژاردن دەبێت

ئەندامێكی سەركردایەتی یەكێتی لەپەیامێكدا هۆشداریدەدات لەوەی، دانانی كەسێكی تر لەجێگەی لاهور شێخ جەنگی بۆ سەرۆكی هاوپەیمانی كوردستان، مەترسی گەورەی دەبێت بۆ ئەنجامی هەڵبژاردنەكان.
ئارام قادر خەبات ئەندامی سەركردایەتی یەكێتی، نامەیەكی ئاراستەی ئۆرگان‌و بەرپرسانی باڵای حزبەكەی كردوەو نوسیویەتی، “وادیارە بڕیارە دەستەی كارگێڕیی‌و مەكتەبی سیاسی لەسەر دانانی سەرۆكێكی نوێی بۆ هاوپەیمانیەكەمان لەگەڵ گۆڕان بۆ هەڵبژاردن كۆببێتەوە، تكایە ئاگاداربن ئەو بڕیارە مەترسی گەورەی دەبێت بۆ ئەنجامی هەڵبژاردنەكان‌و هەروەها دەبێتە هۆی زیاتر بێهیوابونی جەماوەر لەچارەسەربونی كێشەكان”.
ئەوەشیخستۆتەڕوو، “بۆیە تكایە با لەبەر خاتری یەكێتی‌و شادكردنی دڵی جەماوەرەكەمان‌و سەركەوتنمان لەهەڵبژاردنەكان‌و داواكاریی‌و تكای بەردەوامی ئەو هەموو كادیرو جەماوەرو بنەماڵەی شەهیدان‌و پێشمەرگەو تێكۆشەران، با هەمومان نێوانگیریەكانمان‌و كۆبونەوەكانمان لەئێستادا زۆر زۆر گەرمترو گەورەترو بەرفراوانتر بكەین بۆ نێوانگیری كاك لاهورو كاك بافڵ بەئامانجی كۆتاییهێنان بەو كێشەیە جا كێشەكە چەندە گەورەبێت دڵنیابن یەكێتی‌و ئایندەی یەكێتی زۆر زۆر لەوە گەورەترە”.
گۆڕان و یەكێتی بەمەبەستی بەشداری لە هەڵبژاردنی پێشوەختەی عێراق اوپەیمانی كوردستانیان پێكهێناوە و لاهور شێخ جەنگیش سەرۆكایەتی هاوپەیمانیەكەی دەكرد، بەڵام دوای قوڵبوونەوەی ناكۆكیەكانی لەگەڵ بافڵ تاڵەبانی كشانەوەی خۆی لە سەرۆكایەتی ئەو هاوپەیمانیە راگەیاند.
رۆژی یەكشەممە ئەمین بابەشێخ وتەبێژی یەكێتی رایگەیاندبوو: لەداهاتویەكی نزیكیدا بەراوێژ لەگەڵ بزوتنەوەی گۆڕان سەرۆكی نوێی ھاوپەیمانی كوردستان دیاریدەكرێت