فراكسیۆنی یەكێتی لە پەرلەمانی كوردستان رایگەیاند، دەبێت حكومەتی هەرێم كاربكات بۆ هەمە چەشنەكردنی سەرچاوەكانی داھات و قەرەبوكردنەوەی لێبڕینی موچەی موچەخۆران بكرێتەوە.
فراكسیۆنی یەكێتی لە پەرلەمانی كوردستان لە راگەیەندراوێكدا ئاماژەی بەوە كردوە، بڕیارەكەی ئەنجومەنی باڵای ئابوری ھەرێم لەبارەی كۆتایی هێنان بە لێبڕینی موچەی موچەخۆران بەرز دەنرخێنن و جەختیشدەكەنەوە دەبێت حكومەتی هەرێم بەردەوام بێت لە چاكسازیی لە سێكتەرە جیاوازەكانی حوكمڕانی.
راشیگەیاندووە، دەبێت حكومەت كاربكات بۆ هەمە چەشنەكردنی سەرچاوەكانی داهات بەشێوەیەك ئاستی داهات بەرزبكرێتەوە و لە داهاتوویەكی نزیكیشدا قەرەبووی لێبڕینی موچەی موچەخۆران بكرێتەوە.
رۆژی یەكشەممە مەسرور بارزانی سەرۆكی حكومەتی هەرێم رایگەیاند، ئەنجومەنی باڵای ئابوری هەرێم بڕیاریداوە لەم مانگەوە كۆتایی بە لێبڕینی موچە بهێنرێت.