بەپێی هەواڵێكی میدیاكانی باكوری كوردستان گروپێكی 300 كەسی لە نەژادپەرەستانی تورك، هێرشیان كردە سەر خێزانێكی كوردی دانیشتوی ئەنتالیا و سەرجەمیان برینداركردن و پێیان وتوون ئەو شوێنە ناوچەی توركە و نابێت لەوێ بژین، پەرلەمانتارێكی هەدەپەش دەڵێت: هێرشەكان لەزیادبووندان و تائێستا كەس لەسەر هێرشەكان دەستگیرنەكراوە.
لە ناوچەی ئەلماڵری پارێزگای ئەنتالیا، خێزانێكی كورد كە خەڵكی مێردینی باكووری كوردستانن و بۆ كاری كشتوكاڵیی چوونەتە ئەنتالیا، لەلایەن ژمارەیەك نەژادپەرستەوە هێرشیان كرایە سەَر.
سەربەت كورغا، یەكێك لە ئەندامانی ئەو خێزانە بە ئاژانسی مێزۆپۆتامیای ڕایگەیاند: شەوی یەكشەممە نزیكەی 300 نەژادپەرست هێرشیان كردە سەرمان، پراسو و لوتی برایەكیان شكاندم و بەشێكیشمان برینداربووین.
كورغا وتیشی: هۆكاری هێرشەكە، تەنها لەبەرئەوەیە كوردین و پێیانوتین دەبێت خاكی ئێمە چۆڵبكەن.
دەربارەی ئەم هێرشە كەمال بولبول پەرلەمانتاری هەدەپەی ئەنتالیا، بە سایتی رۆژنیوزی راگەیاندوە: لەگەڵ ئەو خێزانە قسەمان كردووە و ئێستا ڕەوشیان باشە و زیانی گیانیان نەبووە، بەڵام مەترسیی لەسەر كوردان لە زیادبووندایە.
لەبارەی رێوشوێنەكانی حكومەت و دەزگا ئەمنییەكانیشەوە وتی: دەزگا ئەمنییەكان بۆ دەستگیركرنی نەژادپەرستان بێدەنگیان هەڵبژاردووە و تائێستا هیچیان نەكردووە و ئۆباڵی زیادبوونی ئەو جۆرە هێرشانەشی خستوەتە ئەستۆی سیاسەتەكانی پارتی ئاكەپەی دەسەڵاتدار و پارتی نەتەوەیەپەرەستی هاوپەیمانی.
ماوەیەكە لە توركیا هێرشی نەژادپەرەستەكان بۆ سەر هاوڵاتیانی كورد زیادی كردووە و لە دوایین هێرشیشدا لە شاریكۆنیا حەوت ئەندامی خێزانێك كۆمەڵكوژكران.
