ئەندامێكی مەكتەبی سیاسی پارتی رایگەیاند، سیناریۆی كێشەكانی ناو یەكێتی ئەوان نەیاننوسیوە دەشڵێت: ئێستا زەمینەكە لەبارترە بۆ نزیكبوونەوەی پارتی و یەكێتی لە داهاتوودا.
هۆشیار زێباری، ئەندامی مەكتەبی سیاسی پارتی لەچاوپێكەوتنێكدا لەبارەی گۆڕانكارییەكانی نێو یەكێتی وتی “ئەمە كێشەیەكی نێوخۆی یەكێتییە، پەیوەندیمان لەگەڵیان هەیە، بەڵام بەڕاستی لە دوای دروستبوونی ئەو كێشە نیوخۆییانە، ئێمە بێلایەن بووینە”.
لە وەڵامی پرسیارێكدا لەبارەی ئەەی بۆچی هەندێكجار تۆمەتبار دەكرێن بەوەی لە بنەڕەتدا سیناریۆیەكە پارتی نووسیویەتی، زێباری دەڵێت “نەخێر، ئێمە هەرگیز نە سیناریۆیەكەمان نووسیوە، نە دەستوەردانمان كردووە، بە پێچەوانەوە لە ماوەی دروستبوونی ئەو كێشەیە هەموو لایەنەكان تەقدیری هەڵوێستی ئێمە دەكەن”.
باسی لەوەشكردووە، “ئەمە كێشەی نێوخۆیە و خۆیان بڕیاری خۆیان دەدەن، بەپێی بنەماكانی نێو یەكێتی، حەز دەكەین بە زووترین كات ئەو كێشەیە چارەسەر ببێت، چونكە نە لە بەرژەوەندی هەرێم و نە لە بەرژەوەندی سلێمانییە، نە لە بەرژەوەندی ئێمەیە وەكو پارتی، چەند زووتر بتوانن زاڵ بن لەسەر ئەمە ناوماڵی خۆیان رێكبخەن، بە دڵنیاییەوە بەپێی تەوافوقی خۆیان”.
زێباری جەختیكردووەتەوە، زەمینەكە لەبارترە بۆ نزیكبوونەوەی پارتی و یەكێتی لە داهاتوودا، ئاراستەكە بەرەو ئەوەیە، جەختیشی كردەوە، بە تێڕوانین و خوێندنەوەی خۆی پەیوەندی پارتی و یەكێتی بەرەو باشتر دەچێت و بەهێزتر دەبێت.