جێگری سەرۆكی پەرلەمانی عێراق، دەڵێت: “بۆ ئەو مانگەش حكوومەتی عێراق بڕیاری داوە 200 ملیار دینار بۆ هەرێمی كوردستان بنێردرێت”.
بەشیر حەداد، جێگری سەرۆكی پەرلەمانی عێراق رایگەیاند: “بۆ ئەو مانگەش حكوومەتی عێراق بڕیاری داوە 200 ملیار دینار بۆ هەرێمی كوردستان بنێرێت و چاوەڕوان دەكرێت، بەم نزیكانە رێوشوێنەكانی ناردنی پارەكە تەواو بكرێت”.
ئاماژەی بەوەش دا، ئەو 200 ملیار دینارەی دەنێردرێت پێشینەیە و تاوەكوو كاری لیژنەكانی وردبینی و هونەری لە داهاتە نانەوتییەكانی هەرێمی كوردستان تەواو دەكرێت بەردەوام دەبێت، وتیشی: “دەبێت حكوومەتی عێراق بۆ شەش مانگی ئەم ساڵ یەک تریلیۆن و 200 ملیار دیناری دیکە بۆ هەرێمی كوردستان بنێرێت، چاوەڕوان دەكرێـت ئەوەش جێبەجێ بكرێت و بنێردرێت”.
جێگری سەرۆكی پەرلەمانی عێراق روونی كردەوە، حكوومەتی عێراق دوا كەوتووە لە جێبەجێكردنی بودجەی 2021، بەتایبەت بۆ ناردنی پشكی پارێزگاكان، باسی لەوەشکرد: “بە نووسراوێك داوامان لە حكوومەتی عێراق كردووە، پەلە بكات لە جێبەجێكرنی بودجە، چونكە لە دواكەوتنی جێبەجێكرنی بودجە، خەڵك زیانمەند دەبێت و پڕۆژەكان دوادەكەون، ناردنی بەشە بودجەی هەرێمی كوردستانیش دوا كەوتووە، بەڵام بەوە قەرەبوو، كراوەتەوە كە تاوەكوو وردبینیی تەواو دەكرێت، مانگانە 200 ملیار دینار وەكوو سولفە بنێردرێت.
بەشیر حەداد روونیشیکردەوە: “ئەو 200 ملیارە بۆ یەك مانگ نییە، بەڵكوو تا ئەو كاتەیە، كە بەشی هەرێمی كوردستان لە بودجە دەدرێت”.
