وتەبێژی هاوپەیمانی نێودەوڵەتی دژ بە داعش ئاشکرای کرد، هێزێکی تایبەتی سەر بە هاوپەیمانێتیەکەیان لە عێراق کشاوەتەوە.
وەین مارۆتۆ وتەبێژی هێزەکانی هاوپەیمانان لە هەژماری خۆی لە تویتەر نوسیویتی: هێزی هۆریزۆن لەدوای تەواوکردنی ئەرکەکانیان لە عێراق کە ئەرکی پاراستن بووە، وڵاتەکەیان جێهێشتووە و گەڕانەتەوە بنکەکەی خۆیان لە کوەیت.
راشیگەیاندووە: لەگەڵ سەربازەکاندا دوو هێلیکۆپتەری جۆری CH_47 چینۆک، کە سەر بەو هێزە بووە کشاونەتەوە.
کشانەوەی ئەم هێزە دوای ئەوە دێت کە عێراق و ئەمریکا لەسەر ئەوە رێککەوتن، کە تاکۆتایی ئەمساڵ هێزە شەڕکەرەکانی ئەمریکا لە عێراق بکشێنەوە.
هاوپەیمانی نێودەوڵەتی بە سەرکردایەتی ئەمریکا ماوەی زیاتر لە شەش ساڵە لە عێراق و سوریا بەشدارە لە شەڕ لە دژی رێکخراوی داعش و چەندین بنکەی لەو دوو وڵاتە هەیە.