توێژەرانی بواری پاراستنی ژینگە لە راپۆرتێكدا كە ئاراستەی نەتەوەیەكگرتوەكانیان كردووە، باس لە زیانەكانی چالاكییە مرۆییەكان دەكەن لەسەر گەرمبوونی زەوی و ئاماژەیان بەوەكردووە، كە ئەو گۆڕانكارییانە زەوی و مرۆڤایەتی بەرەو كارەسات دەبات.
لە راپۆرتەكەدا باس لەوەكراوە، كە بە هۆی بەكارهێنانی لە رادەبەدەری سوتەمەنی، پلەكانی گەرما زیادی كردووە و تەنها لە ماوەی نۆ ساڵی رابردوودا پلەی گەرمای گۆی زەوی یەك پلە زیادی كردووە، ئەوەش یەكسانە بە بەرزبوونەوەی پلەكانی گەرما لە نێوان ساڵانی 1850 بۆ 1900.
ئەوەشخراوەتەڕوو، كە پلەكانی گەرما لە پێنج ساڵی رابردوودا بەرزترین ئاستی تۆماركراو بوون لە ساڵی 1950ەوە، هەروەك ئاماژەیان لە ئەنجامی چالاكیە مرۆییەكان بەستەڵەكەكان و شاخە سەهۆڵەكان بە رێژەیەكی بەرچاو تواونەتەوە و بەهۆیەوە بەرزبوونەوەی ئاستی ئاوی دەریاكان لە ئێستادا بۆ سێ هێندەی ساڵانی 1901 بۆ 1970 زیادی كردووە.
لە راپۆرتەكەدا هۆشداریشدراوە لەوەی كە لە ئەنجامی بەردەوامی توانەوەی شاخە سەهۆڵەكان ئاستی ئاوی دەریاكان تا كۆتایی ئەم سەدەیە بۆ دوو مەتر بەرزدەبێتەوە، ئەمەش بە واتای ژێر ئاوكەوتنی رووبەرێكی فراوانی زەوییە.
لای خۆیەوە ئەنتۆنیۆ گۆتێرێز سكرتێری گشتیی نەتەوەیەكگرتوەكان، راپۆرتەكەی بە لێدانی زەنگی مەترسی بۆ مرۆڤایەتی ناوبردووە و داوای لە دەوڵەتانی جیهان كردووە دەردانی گازە زیانبەخشەكان كەمبكەنەوە، كە دەبنە هۆی گەرمبوونی زەوی، هەروەك راشیگەیاندووە، هێشتا كات لەبەردەستدا ماوە بۆ رزگاركردنی زەوی لە كارەساتێكی ژینگەیی و دواكەوتنی هەنگاوەكانیش بەو ئاراستەیە هیچ پاساوێك هەڵناگرێت.
