بەڕێوەبەری گشتی دەستەی سكاڵانامەی موڵكداری لە هەرێم رایگەیاند، سەرجەم ئەو كەسانەی لە لایەن رژێمی پێشووی عێراقەوە موڵكەكانیان دەستیبەسەرگیراوە و بڕیاری قەرەبوكردنەوەیان هەیە، لەماوەی ئەمساڵدا پارەی قەرەبوكردنەوەكەیان وەردەگرن.
تارا ئەنوەر قەرەداغی، بەڕێوەبەری گشتی دەستەی سكاڵانامەی موڵكداری لەراگەیەنراوێكدا ئاماژەی بەوەشكردوە، ئەمساڵ دەستەكەیان قۆناغێكی دیكەی قەرەبوكردنەوەی هاوڵاتیان جێبەجێ دەكات، دوای ئەوەی ئەو كەسانەی بڕیاری قەرەبوكردنەوەیان هەیە، دۆسییەكانیان لەلایەن لیژنە دادوەرییەكانەوە یەكلایی كراوەتەوە.
ئاماژەی بەوەشكرد، داوا لەسەرجەم هاوڵاتیان دەكەن ئەوانەی بڕیاری قەرەبوكردنەوەیان هەیە سەردانی دەستەكەیان بكەن و رێكارە یاساییەكان تەواو بكەن، بۆ ئەوەی لەكاتی گەیشتی بودجەی قەرەبوكردنەوە، راستەوخۆ پارەكە وەربگرن.
ساڵی 2019ش حكومەتی عێراقەوە بەمەبەستی قەرەبوكردنەوەی هاوڵاتیانی هەرێمی كوردستان كە موڵكەكانیان لەلایەن رژێمی بەعس دەستی بەسەردا گیرابو، بەچەند قۆناغێك بودجەی قەرەبوكردنەوە بۆ كوردستان رەوانەكرا.
