بەپێی توێژینەوەیەكی نوێی ئەمریكی، بەكارهێنانی مۆبایل لەكاتی كۆبونەوە و دانیشتن لەگەڵ هاوڕێكانتدا، ئاسەواری مەترسیداری كۆمەڵایەتی و تەندروستی لێ دەكەوێتەوە.
بەپێی توێژینەوەكە كە زانكۆی جۆرجیا لە ئەمریكا ئەنجامیداوە، بەكارهێنانی مۆبایل لەكاتی كۆبونەوە و دانیشتن لەگەڵ هاوڕێكانتدا جگە لەوەی كە پشتگوێخستنی هاوڕێكانتە لە بەرژەوەندی تۆڕە كۆمەڵایەتییەكان كە پێی دەوترێت “فۆبینگ”، كاریگەری مەترسیداریشی لەسەر پەیوەندییەكان هەیە.
رونیشكراوەتەوە، توێژینەوەكە لەسەر 472 خوێندكار كراوە و دەركەوتووە ئەوانەی كە هاوڕێكانیان لەپێناو مۆبایلەكانیان پشگوێ دەخەن و زیاد لە پێویست بەكاری دەهێنن خەمۆكی و نیگەرانی كۆمەڵایەتییان زیاد دەكات و بەردەوامیش پشتگوێخستنی هاوڕێكانیان زیاد دەكات.
بەپێی هەمان توێژینەوە، ئەو كەسانەی كە پێیان خۆشە زیاتر لە تۆڕە كۆمەڵایەتیەكان پەیوەندییان هەبێت وەك لەوەی رووبەڕوو هەیانبێت، نیگەرانی كۆمەڵایەتیان زیاترە و ئەوەش كاریگەری لەسەر ئاستی توڕەیی و دان بەخۆدا گرتنیان دەكات، ئەوانەشی نیگەرانی كۆمەڵایەتی و خەمۆكیان هەیە زیاتر ئەگەری ئالودەبوونیان هەیە بە مۆبایلەكانیانەوە.
جەخت لەوەش كراوەتەوە، بەڵام ئەو كەسانەی زیاتر لە كۆمەڵگەدا قبوڵ كراون كەمتر ئالودەی مۆبایلەكانیان دەبن لەكاتی كۆبوونەوەیان لەگەڵ هاوڕێكانیاندا، هەروەها زیاتر هەڵوێستی جوان و هاریكاری و كاردانەوەیان هەیە لە پەیوەندییە كۆمەڵایەتییەكانیاندا.
