ئەمریكا و هەر یەك لە وڵاتانی بەریتانیا، نیوزلەندا و ئوستراڵیا هۆشداری دەدەنە هاوڵاتیانیان و ئەوانەی ڤیزای ئەو وڵاتانەیان هەیە، خۆیان لە هەر جۆرە گردبوونەوەیەك لە بەردەم دەروازەكانی فڕۆكەخانەی كابۆل دووربخەنەوە، چوونكە ئەگەری ئەنجامدانی هێرشی خۆكوژی لەو ناوچەیە لە ئارادایە.
باڵیۆزخانەی ئەمریكا لە كابۆل لە راگەیەنراوێكدا باسی لەوەكردووە، كە پێویستە هاوڵاتیانی ئەمریكی كە لە ئەفغانستانن ماونەتەوە خۆیان لە فڕۆكەخانەی حامید كارزای بەدوربگرن و لە ئەگەری سەردانیشیان لەبەردەم سێ دەروازەی ئەو فڕۆكەخانەیەدا كۆنەبنەوە.
داواشی كردووە، هاوڵاتیانی ئەمریكا تەنها دوای ئەوەی لە لایەن نوێنەرێكی فەرمی واشنتۆنەوە پەیوەندییان پێوەدەكرێت، بەرەو فڕۆكەخانەكە بەڕێبكەون.
لای خۆشیانەوە هەر یەك لە بەریتانیا، نیوزلەندا و ئوستراڵیاش داوایان لە هاوڵاتیانیان و ئەو ئەفغانیانە كردووە كە هەڵگری ڤیزای ئەو سێ وڵاتەن، كە بە هەموو جۆرێك لە گردبوونەوە لە بەردەم دەروازەكانی فڕۆكەخانەی كابۆل دووربكەونەوە، چوونكە مەترسی ئەنجامدانی هێرشی خۆكوژی لە ئارادایە.
لەدوای 15ی ئاب، كە تاڵیبان چووە ناو كابۆلەوە هەزاران هاوڵاتی بیانی و ئەفغانی روویان لە فڕۆكەخانەی ئەو شارە كردووە بە مەبەستی جێهێشتی ئەفغانستان و تائێستا بەشێكیان گواستراونەتەوە و پڕۆسەكەش بەردەوامە.
