بەرهەم ساڵح: عێراق پێویستی بە كۆمەك و هاوكارییە بۆ ئەوەی بكەوێتە سەر پێی خۆی

بەرهەم ساڵح سەرۆك كۆماری عێراق رایگەیاند: “وڵاتەكە پێویستی بە كۆمەك و هاوكارییە، بۆ ئەوەی بكەوێتەوە سەرپێی خۆی، چاویشی لەوەیە فەرەنسا بەردەوام بێت لە هاوكاری و پشتیوانكردن”.
لە كۆنفرانسێكی رۆژنامەوانی هاوبەشدا لەگەڵ ئیمانوێل ماكرۆن سەرۆكی فەرەنسا، لە بەغدا بەرهەم ساڵح وتی: ” لە كۆبوونەوەماندا لەگەڵ ماكرۆن باسمان لە بەڕێوەچوونی لوتكەی بەغدا كرد، هەروەها ئاماژەمان بەوەدا كە چەند ساڵێك عێراق كرابوو بە چەقی ململانێی هەندێك وڵاتی ناوچەكە، ئامادەبوونی سەركردە و نوێنەری وڵاتان لە كۆنگرەی بەغدا پشتیوانیەكی گرنگە لەپێناو سەروەری و گەشەپێدانی زیاتری عێراق، هاوكات بەرژوەندی هاوبەش كە عێراق بە وڵاتان دەبەستێتەوە، سەربەخۆبوونی عێراق دەبێتە مایەی سەقامگیری ناوچەكە و بەرەنگاربوونەوەی تیرۆر”.
وتیشی: “عێراق پێویستی بە كۆمەك و هاوكاری كۆمەڵگەی نێودەوڵەتی هەیە، بۆ ئەوەی بكەوێتەوە سەرپێی خۆی و ئاشتی و سەقامگیری لە عێراق بچەسپێت، چاویشمان لە فەرەنسایە كە هاوكاری و پشتیوانیەكانی بۆ عێراق بەردەوام بێت”.
لای خۆیەوە ئیمانوێل مكرۆن رایگەیاند: “هاوكاری و هەماهەنگی باش لەنێوان فەرەنسا و عێراق هەیە لە بواری ئابووری و بەرەنگاربوونەوەی تیرۆر، بۆ سەقامگیری عێراق، هەوڵدەدەین لە چەند مانگی داهاتوودا چوارچێوەیەكی نوێ بدۆزینەوە، بۆ ئەوە عێراق پارێزراوبێت و بەرەوپێش بچێت، فەرەنسا هەمیشە وەڵامدەرەوەی داواكانی حكومەتی عێراق و گەلەكەی دەبێت”.
سەرۆكی فەرەنسا، باسی لەوەشكرد: “بۆ بەڕێوەچوونی هەڵبژاردنێكی پاك و بێگەرد و دروستكردنی حكومەتێكی دادپەروەر هەمیشە هاوكاری عێراق دەبم”.

هەواڵی دواتر

تەندروستی عیراق بڕیاری لەناوبردنی سەگی بەرەڵا دەدات

وەزارەتی تەندروستی عیراق هۆشداریدا لەبڵاوبونەوەی نەخۆشی هاری لەناو هاووڵاتیاندا. وەزارەتی تەندروستی عیراق لەنوسراوێكدا كە ئاڕاستەی …

وەڵامێک بنووسە

پۆستی ئەلکترۆنیکەت بڵاو ناکرێتەوە .