وەزیری دارایی و ئابوری حكومەتی هەرێم دەڵێت: بڕیاری كردنەوەی ئەژمێری بانكی بۆ موچەخۆران كەوتوەتە بواری جێبەجێكردنەوە، هاوكات سەرپەرشتیاری لیژنەی جێبەجێكردنی یاسای چاكسازیش دەڵێ تا ئێستا 450 هەزار موچەخۆر لە كوردستان ئەژمێری بانكیان بۆ كراوە.
لە دیوانی وەزارەتی دارایی هەرێمی كوردستان كۆبوونەوەی نێوان وەزارەت و بانكە بازرگانییەكان بەڕێوەچوو، تا كۆدی بێ هاوتایان پێ بدرێت بۆ دابەشكردنی مووچەی مووچەخۆرانی هەرێمی كوردستان.
دوای كۆبوونەوەكە ئاوات شێخ جەناب وەزیری دارایی و ئابووری هەرێمی كوردستان لە كۆنگرەیەكی ڕۆژنامەنووسیدا رایگەیاند: بەپێی یاسای چاكسازی لە هەریمی كوردستان كە لە مانگی حەوتی ساڵی 2020وە جێبەجێ كراوە، بڕگەیەكی تێدایە تایبەت بە كردنەوەی ئەژمێری بانكی بۆ مووچەخۆرانی هەرێمی كوردستان، لەمڕۆوە ئەو بڕیارە چووەتە واری جێبەجێكردنەوە، بۆ ئەوەی مووچەخۆران لە ڕێی بانكەوە مووچەكانیان وەرگرن، ئەویش هەم بۆ پێدانی مووچە، هەروەها بۆ وەرگرتنی باركۆدی بێ هاوتایە بۆ ئەوەی مووچەخۆران بۆ تەواوی كاروبارەكانی خۆیان ئەو ئەژمارە بەكار بێنن.
لەلایەن خۆیەوە عەبدولحەكیم خەسرەو، سەرپەرشتیاری لیژنەی جێبەجێكردنی یاسای چاكسازی وتی: ئێستا كۆدی بێهاوتای تەواوی فەرمانبەرانی هەرێمی كوردستان كراوەتەوە و رادەستی وەزارەتی دارایی كراوە و ئێستاش ڕادەستی بانكە بازرگانییەكان دەكرێت و لەو سیستمەدا پرۆسەكە بەردەوام دەبێت و سیستمی ئەلیكترۆنی بانكی كاری لەسەر دەكات كە نزیكەی 20 بانك كاردەكەن و هەموویان بە سیستەمێكی ئەلیكترۆنی هەموو بانكەكان بەیەكەوە دەبەستنەوە.
عەبدولحەكیم خەسرۆ وتیشی، تا ئێستا 450 هەزار موچەخۆرلە كوردستان ئەژمێری بانكیان بۆ كراوە و پرۆسەكەش بەردەوام دەبێت.
