وەزارەتی بەرگریی ئەمریكا (پنتاگۆن) رایگەیاند، دوایین هێزەكانیان لە فڕۆكەخانەی كابۆل كشاندوەتەوە، بەمەش كۆتایی بە 20 ساڵ ئامادەیی سەربازی ئەو وڵاتە لە ئەفغانستان هات.
دوابەدوای راگەیەنراوەكەی پنتاگۆن، باڵیۆزخانەی ئەمریكا لە كابۆلیش هەڵپەساردنی كارەكانی راگەیاند و ئاشكرای كرد، لە دەوحەی پایتەختی قەتەرەوە درێژە بە كارەكانی پەیوەست بە ئەفغانستان دەدەن.
لەلایەكی ترەوە دوای كشانەوەی هێزەكانی ئەمریكا لە فڕۆكەخانەی كابۆل و كۆنتڕۆڵكردنی فڕۆكەخانەكە لەلایەن چەكدارانی تاڵیبان، بەرپرسانی ئەو بزوتنەوەیە چوونە ئەو شوێنە و لە وتەیەكدا زەبیحوڵا موجاهید وتەبێژی تاڵیبان پیرۆزبایی ئەو سەركەوتنەی لە چەكداران و سەركردەكانیان كرد.
موجاهید وتی: گەیشتن بە سەربەخۆیی بەری رەنج و پشودرێژی چەكداران و سەركردەكانی تاڵیبانە و بە درێژایی 20 ساڵی رابردوو سەرباری هەموو دژواری و ناخۆشیەكان پێداگر بوون و كۆڵیان نەداوە.
دوابەدوای هێرشەكانی 11ی سیپتەمبری 2001 ئەمریكا بە تۆمەتی داڵدەدانی قاعیدە هێرشی كردە سەر ئەفغانستان و كۆتایی بە دەسەڵاتی پێنج ساڵەی تاڵیبان هێنا، بەڵام بەدرێژایی ساڵانی دواتر شەڕ لەو وڵاتە بەردەوام بوو.
دواجار و دوای دانوستانێكی درێژخایەن ساڵی رابردوو لە دەوحەی قەتەر ئەمریكا لەگەڵ تاڵیبان رێككەوت كە هێزەكانی لە ئەفغانستان بكشێنێتەوە.
