ئەندامێكی جڤاتی گشتیی بزووتنەوەی گۆڕان رایگەیاند، تائێستا بە فەرمی لە لایەن یەكێتییەوە داوای یەكگرتنەوەیان لێنەكراوە و لەوەها حاڵەتێكیشدا هەڵسەنگاندنی بۆ دەكەین و بە فەرمی وەڵامی دەدەینەوە.
مەریوان حوسێن فەرحان، ئەندامی جڤاتی گشتیی بزووتنەوەی گۆڕان لە لێدوانێكدا بۆ ماڵپەڕی كوردپرێسی لە بارەی پرسی یەكگرتنەوەی یەكێتی و گۆڕان رایگەیاندووە: تا ئەم كاتە لە هیچ كۆبوونەوەیێكی ڕەسمیی گۆڕاندا باسی یەكگرتنەوە نەكراوە، بەڵام ئەگەر ئەم پێشنیارە بە ڕەسمی ئاڕاستەی بزووتنەوەی گۆڕان بكرێت هەر دوو جڤاتی گشتی و نیشتمانی و خانەی ڕاپەڕاندن هەڵسەنگاندنی بۆ دەكەن و بۆچوونی خۆمان لەو بارەیەوە دەخەینە ڕوو و بە ڕەسمی وەڵامی یەكێتی دەدەینەوە.
ئەندامەكەی جڤاتی گشتیی گۆڕان لەبارەی كاریگەریی ناكۆكی و ململانێ ناوخۆییەكانی یەكێتی لە سەر هاوپەیمانێتیی بزوتنەوەكەیان و ئەو حزبە رایگەیاندووە، گۆڕان هەموو ڕێككەوتنەكانی چ لە گەڵ یەكێتی و چ لەگەڵ هێزە كوردستانییەكانی تر وەكوو پارتی بە نیەتێكی ساف و پاكەوە كردوویەتی ئەگەرچی لە جێبەجێكردنیشیدا كێشە دروست بووبێ، بەڵام ئێمە ئێستا گەشبینین بەم هاوپەیمانێتییە لەبەر ئەوەی یەكێتی شێوازی كاركردنی گۆڕیوە.
بافڵ تاڵەبانی، هاوسەرۆكی یەكێتی لە دوا چاوپێكەوتنی رۆژنامەوانی خۆیدا خواستی خۆی بۆ یەكگرتنەوەی حزبەكەی و گۆڕانی دەربڕیبوو.
