قوباد تاڵەبانی، جێگری سەرۆكی حكومەتی هەرێم رایگەیاند، هەندێك هێز و لایەن لەعێراق دەیانەوێت وڵات بگەڕێننەوە بۆ سەردەمی حكومڕانی مەركەزی و ئەوەش مەترسی لەسەر دەستوری فیدڕاڵی دروستكردووە.
لە میانی سەردانێكی دا بۆ چەمچەماڵ قوباد تاڵەبانی رایگەیاند، “لێرەین تاوەكو پێتان بڵێین كە هەر لێرەوە دەچینەوە بۆ بەغدا و تاوەكو لەبەغدا بەرگری لە ماف و شایستەكانی ئێوە بكەین. كە كەكوردستان ئەنفالكرا، لەبەر ئەوەبوو خەڵكی كوردستان ئەو كاتە داوای مافی خۆیان دەكرد و ئەنفال كراین لەبەر ئەوەی كە كورد بووین”.
جێگری سەرۆكی حكومەتی هەرێم ئاماژەی بەوەشكرد، “ئەمڕۆ خۆشبەختانە ئێمە دەستورێكمان هەیە كە ئەو دەستورە مافی كوردستانی پاراستووە، بەڵام ئەم دەستورە لەژێر مەترسیدایە چونكە هێز و لایەن هەیە لەعێراق كە دەیانەوێت وڵات بگەڕێنەوە بۆ مەركەزییەت، عێراق كە ئەمڕۆ ئەو مافەی كوردستان هەیەتی، لێ بسەنرێتەوە”.
