بەرهەم ساڵح سەرۆك كۆماری عێراق دەڵێت، بارودۆخی ئێستای عێراق مایەی قبوڵ كردن و بەردەوام بوون نییە، لە ئێستادا گفتوگۆی سیاسی و كۆمەڵایەتی هەیە سەبارەت بە پێداچوونەوەی دەستور.
بەرهەم ساڵح لە بەشێكی چاوپێكەوتنێكی لەگەڵ كەناڵی جزیرە ئاماژەی بەوەداوە، گفتوگۆی سیاسی و كۆمەڵایەتی هەیە سەبارەت بە گرنگی پێداچوونەوە بە دەستوردا، ئیجابیاتی زۆرە بەڵام لە هەندێك شوێنیش كێشەی هەیە و پێویستیان بە چارەسەرە.
رونیشیكردووەتەوە، قۆناغی داهاتووی عێراق یەكلاكەرەوەیە و ناكرێت دوای 18 ساڵ ئینجا دان بە بوونی كێشەدا بنێیت لە سیستمی حكوم گرنگە هەنگاو بەرەو چاكسازی بنێین، جوڵانەوەی میللی بە دڵنیاییەوە سەركەوتنی بەدەستهێنا لەوەی كە جەختی لەسەر گرنگی چاكسازی بارودۆخی سیاسی كردەوە و داوای هەڵبژاردنی پێشوەختەی كرد.
سەرۆك كۆماری عێراق لە بەشێكی تری قسەكانیدا وتویەتی، بارودۆخی ئێستای عێراق جێی قبوڵكردن و بەردەوام بوون نییە، كاتی ئەوەیە دوای ئەو هەموو ساڵە سەختە عێراق خاوەنی سیستمێكی فەرمانڕەوای دانا بێت، كە گرەنتی ژیانێكی ئازاد و شەریفانە بۆ هاوڵاتیانی بكات، داوا دەكات دەیەیەكی سیاسی نوێ دەست پێبكات و تێیدا دەوڵەتێكی بە توانا بنیان بنرێت كە بتوانێت گەلەكەی بپارێزێت و خزمەتیان بكات و لەگەڵ هاوڵاتیان و دراوسێكانیدا لە ئاسایشدا بژی.
