بەتۆمەتی ناوزڕاندن و بڵاوكردنەوەی پۆستی فەیسبوك لەسەر پۆلیس و پارێزگاری دھۆك، ڕۆژنامەنووس ئومێد بەڕوشكی بە سزای ساڵێك زیندانیكردن حكومدرا.
تیمی كوردستانی عێراقی CPT، رایگەیاند، رۆژی پێنج شەممە بەتۆمەتی ناوزڕاندن و بڵاوكردنەوەی پۆستی فەیسبوك لەسەر پۆلیس و پارێزگاری دھۆك، ڕۆژنامەنووس ئومێد بەڕوشكی بە سزای ساڵێك زیندانیكردن حكومدرا.
باسی لەوەشكردووە، لە (22)ی حوزەیراندا، ئومێد بەهەمان تۆمەت سزای ساڵێك زیندانی بەسەردا سەپێندرا و لە ئێستاشدا چاوەڕێی دانیشتنی دادگاییكردنی سێیەمی دەكات كە بڕیاروایە لە (12)ی تشرینی یەكەمدا بەڕێوەبچێت و تۆمەتباركراوە بە سیخوڕیكردن و ئەنجامدانی كاری تێكدەران.
CPT رونیشیكردوەتەوە، ئەوە چوارەمین جارە كە ئومێد بەڕۆشكی بە تۆمەتی ناوزڕاندن حكومدەدرێت و دۆسیەیەكی تری ناوزڕاندنیش لەسەری كراوەتەوە، چاوەڕێ دەكات ڕۆژی دانیشتنی ئەو دادگاییەش دیاری بكرێت.
تیمی كوردستانی عێراقی CPT، پێیوایە خراپ بەكارهێنانی یاسا و ئەم جۆرە لە حكومدان و تاوانباركردنانە بۆ سنورداركردنی ئازادی ڕادەربڕینە لە هەرێمی كوردستاندا.
بەدەیان چالاكوان و رۆژنامەنوسی بادینان زیاتر لە ساڵێكە بە تۆمەتی جیاجیا دەستگیركراون و تائێستا تەنها چەند كەسێكیان دادگایی كراون و ئەو دۆسیەی لەسەر ئاستی ناوخۆ و دەرەوە كاردانەوە و ناڕەزایەتی زۆری لێكەوتوەتەوە.
