مستەفا كازمی، سەرۆك وەزیرانی عێراق كۆنفرانسی ژمارەیەك كەسایەتی عێراقی لە هەولێر بە نایاسایی ناودەبات كە تیایدا داوای ئاساییكردنەوەی پەیوەندییەكانی بەغدا و تەلئەبیب كرابوو، بە توندیش ئەو داوایە رەتدەكاتەوە.
نوسینگەی راگەیاندنی سەرۆك وەزیرانی عێراق رایگەیاند، حكومەت بە توندی كۆبوونەوەی نایاسایی چەند كەسایەتیەكی عەشایەری دانیشتووی هەولێر و داخوازیەكەیان لە بارەی ئاساییكردنەوەی پەیوەندییەكان لەگەڵ ئیسرائیل رەتدەكاتەوە.
راشیگەیاند، ئەو كەسایەتیانە نوێنەرایەتی هیچ شارێك ناكەن وەك ئەوەی بانگەشەی بۆ دەكەن، بەڵكوو نوێنەری ئەو كەسانەن، كە كار بۆ نانەوەی پشێوی و بڵاوكردنەوەی رق دەكەن لە كۆمەڵگادا، ئەمەش لە كاتێكدا ولاتەكە بەرەو هەڵبژاردنێكی دادپەروەرانەی پێشوەخت دەچێت، كە خواستی هاوڵاتیانە.
راشیگەیاندووە، پێشنیازی ئاساییكردنەوەی پەیوەندییەكان لەگەڵ ئیسرائیل لە رووی سیاسی و یاساییەوە بە تەواوەتی رەتدەكەنەوە و عێراق پێداگرە لەسەر هەڵوێستی لەمێژینەی خۆی، كە بریتیە لە پشتیوانی لە فەلەستین و مافی فەلەستینیەكان بۆ ئەوەی ببنە خاوەنی دەوڵەتێكی سەربەخۆ كە پایتەختەكەی قودس بێت و سەرجەم داگیركاریی و ستەمەكانی ئیسرائیل لە دژی فەلەستینیەكانیش رەتدەكەنەوە.
ئەمەش دوای ئەوە دێت، كە رۆژی هەینی لە كۆنفرانسێكدا بە بەشداری سەدان كەسایەتی عێراقی، كە لە هەولێر بەڕێوەچوو، داوا كرا حكومەتی بەغدا رێككەوتنی ئیبراهیم بۆ ئاساییكردنەوەی پەیوەندیەكان لەگەڵ ئیسرائیل واژۆ بكات.
