جێنین هێنیس پلاسخارت نوێنەری تایبەتی سكرتێری گشتی نەتەوە یەكگرتووەكان بۆ عێراق، لە پەیامێكدا لە بارەی هەڵبژاردنی پێشوەختەوە رایگەیاند، كە عێراقییەكان، دەرفەتی ئەوەیان هەیە، دەنگیان ببیسترێت.
پلاسخارت لە تۆمارێكی ڤیدیۆییدا كە لەلایەن نێردەی نەتەوە یەكگرتووەكان لە عێراق بڵاوكراوەتەوە وتی: “لە تشرینی یەكەمی 2019دا، ژمارەیەكی زۆر لە عێراقییەكان رژانە سەر شەقامەكان و دژبە خراپی رەوشی ئابووریی، كۆمەڵایەتی سیاسی، خۆپیشاندانیان ئەنجامدا”.
وتیشی: “دوای تێپەڕبوونی دوو ساڵ لە خۆپیشاندانەكانی عێراق، ئێستا یەكێك لە داواكارییە سەرەكییەكانی خۆپیشاندەران بەدیهاتووە، ئەوەیش هەڵبژاردنەكانی پێشوەختە كە مانگی داهاتوو ئەنجام دەدرێت”.
نوێنەری تایبەتی سكرتێری گشتیی نەتەوە یەكگرتووەكان بۆ عێراق، لە پەیامەكەیدا بۆ عێراقییەكان ئەوەیشی وتووە: “لە كاتی چوونتان بۆسەر سندوقەكانی دەنگدان، دەرفەتی ئەوەتان هەیە، دەنگی ئێوە ببسترێت و لە هەر هەنگاوێك كە دەینێن، نەتەوە یەكگرتووەكانیش بەردەوام پاڵپشتان دەبێت”.
بڕیارە هەڵبژاردنەكانی پێشوەختە لە عێراق لە 10ی تشرینی یەكەمی ئەمساڵ ئەنجام بدرێت و سێ هەزار و 249 كەس كە نوێنەرایەتی 21هاوپەیمانیی و 109 پارت دەكەن لە 83 بازانەی هەڵبژاردندا، خۆیان كاندیدكردووە بۆ كێبڕكێكردن لەسەر 329 كورسی پەرلەمانی عێراق
