لەدوا کۆبوونەوەی رێکخراوی پێنی نێونەتەوەیی، نوسەرێکی کورد وەک سەرۆکی نوێی ئەو رێکخراوەیە هەڵبژێردرا.
ئەسلیخان یەڵدرم، هاوسەرۆکی پێنی کوردی سەر بە پێنی نێونەتەوەیی رایگەیاندوە: بورهان سونمەز، نوسەری باکوری کوردستان، کە ماوەی چەند ساڵێکە ئەندامی دەستەی بەڕێوەبەری پێنی نێونەتەوەییە وەک سەرۆکی نوێی ئەو رێکخراوەیە هەڵبژێردرا.
ئەو نوسەرە کوردە ساڵی 1965 لە ناوچەی هایمانای باکوری کوردستان لەدایکبووە و دەرچووی بەشی یاسایە و خاوەنی پێنج رومانە، کە بۆ سەر 42 زمان وەرگێڕدراون.
پێنی نێودەوڵەتی (PEN International) لە ساڵی 1921دا لە لەندەن دامەزراوە و لە زیاتر لە 100 وڵات نوێنەرایەتی هەیە و لە کۆتایی هەشتاکانی سەدەی رابردووشدا بەشی کوردی پێن دامەزراوە.
ئەرکی سەرەکی رێکخراوەکە داکۆکیکردنە لە نوسەران و ئازادی نوسین و رادەربرین لە سەرتاسەری جیهان و بە یەکێک خاوەن قورساییترین رێکخراوەکانی ئەو بوارە دادەنرێت.
