قوباد تاڵەبانی سەرۆكی هاوپەیمانیی كوردستانی دەڵێت، هاوپەیمانی نێوان یەكێتی نیشتیمانی كوردستان و بزوتنەوەی گۆڕان تەنها بۆ هەڵبژاردن نییە، بەڵكو درێژەی دەبێت بۆ گەڕاندنەوەی سەقامگیری سیاسی و ئابوریی.
قوباد تاڵەبانی لە میانەی بەشداریكردنی لەكەرنەڤاڵی ناساندنی كاندیدەكانی هاوپەیمانی كوردستان لە قەزای پێنجوێن لە وتەیەكدا باسی لەوەكرد، ئەم هاوپەیمانێتییە تەنیا بۆ ئەم هەڵبژاردنە نیە، بەڵكو بۆ گەڕاندنەوەی ئارامی و سەقامگیرییە بۆ ناو كۆمەڵگە.
باسی لەوەشكرد، لەئامانجەكانی هاوپەیمانێتیەكە پاراستنی یەكڕیزییە، گەڕانەوەی سەقامگیری سیاسی و ئابوری و كۆمەڵایەتییە، بەم شێوەیە كوردستان دەپارێزین و گەشەی پێ دەدەین، جاران ركابەرییەكی ناوخۆیی هەبوو بۆیە دەنگەكانی خۆمان پەرت و بڵاو كردبوو، بۆمان دەركەوت تاوەكو پەرت و بڵاو بین لاوازین، كە لاواز بووین ناوچەكانمان دەكەوێتە ژێر مەترسییەوە، بۆیە بریارمان داوە ئەمجارە لەژێر چەتری هاوپەیمانی بەیەكەوەبین.
قوباد تاڵەبانی ئاماژەی بەوەشدا، نەهاتووم پەردەپۆشی هیچ كەم و كورتییەكی حوكمڕانی بكەم، بەڵام هاتووم ئەوەتان بۆ روون بكەمەوە بۆچی گرنگە بەشداری هەڵبژاردن بكەین، كوردستان لەم چوارساڵەی داهاتوو توشی ركابەری زیاتر دەبێتەوە لەرووی ئابوری و دارایی و ئەمنی و سەربازیشەوە.
