ئاوات شێخ جەناب، وەزیری دارایی و ئابووری حكومەتی هەرێمی كوردستان ئاشكرای كرد، حكومەتی هەرێم درێغی نەكردووە و نایكات بۆ دابینكردنی مووچە، ئومێد هەیە ئەم مانگە بەغدا 200 ملیارەكە بنێرێت.
ئاوات شێخ جەناب لە كۆنگرەیەكی رۆژنامەوانیدا وتی، بەپێی بڕیاری ئەنجومەنی وەزیرانی عێراق كە دوو جار ئەو بڕیارەی دەركردووە و بەپێی ئەو دڵنیاییانەی داویانە، ئومێدمان ئەوەیە كە 200 ملیار دینارەكە دێت.
ئاماژەی بەوەشداوە، بەڵام هەموومان ئەزموونی پێشووی عێراق دەزانین و دۆخی عێراق لە ئان و ساتدایە بە ئەرێنی یان نەرێنی، بەڵام ئەوەی كە گرنگە حكومەتی هەرێم هیچ كەمتەرخەمی نەكردووە و نایكات بۆ دابینكردنی موچەی هاوڵاتیان، هیواداریشین عێراق لەسەر ئەم سیاسەت و عەقڵیەتەی ئێستای بەردەوام بێت.
وەزیری دارایی حكومەتی هەرێمی كوردستان جەختی لەوەش كردەوە، لە7ی مانگەوە بە فەرمی نوسراومان ئاڕاستەی وەزارەتی دارایی عێراق كردووە، بەگوێرەی زانیارییەكان تائێستا تەمویلیان نەكردووە و چاوەڕێ دەكەین.
