موزهەر محەمەد ساڵح راوێژكاری ئابوریی سەرۆك وەزیرانی عێراق دەڵێت، ئەگەری هەیە لە پرۆژە یاسای بودجەی 2022دا نرخی بەرمیلێك نەوت بە 50 دۆلار دیاری بكرێت، بەهیچ شێوەیەك دەست بۆ موچەی فەرمانبەران نابرێت و پشكی كوردیش بەندە بە گفتوگۆكانەوە.
موزهەر محەمەد ساڵح لە لێدوانێكی رۆژنامەوانیدا ئاماژەی بەوەداوە، پرۆژە یاسای بودجە لە پرۆژە گرنگەكانی وڵاتە، بۆیە یەكەم ئەركی پەرلەمانی داهاتوو پرۆژە یاسای بودجەی 2022 دەبێت، پێشبینی ئەوە دەكەن نرخی یەك بەرمیل نەوت بە 50 دۆلار دیاری بكرێت، ئەگەر دەوڵەت بۆ ماوەی هەر 12 مانگەكە بۆ هەر بەرمیلێك 70 دۆلاری بۆ بمێنێتەوە، ئەوا لەگەڵ داهاتی نانەوتی بارودۆخەكە باش دەبێت.
راوێژكارەكەی سەرۆك وەزیرانی عێراق هێمای بۆ ئەوەش كردووە، پرۆژە یاسای بودجەی 2022 دەرفەتی دامەزراندنی تێدا دەبێت بەڵام زۆر نییە، بەهیچ شێوەیەكیش دەست بۆ موچەی فەرمانبەران نابرێت.
سەبارەت بە پشكی كورد لە پرۆژە یاساكەدا ئاماژەی بەوەداوە، ئەوە لەسەر گفتوگۆ سیاسیەكانی نێوان هەردوو حكومەتی بەغدا و هەرێمی كوردستان بەندە، هەروەها ئەوەش هەمووی پەیوەندی بە پەرلەمانەوە هەیە.
