شەڕ و پێكدادانی نێوان گروپە تاوانكارییە بەندكراوەكانی گرتووخانەیەك لە ئیكوادۆر نزیكەی 200 كوژراو و برینداری لێكەوتەوە و ئەمەش خوێناویترین رووداوی ناو زیندانەكانی ئەو وڵاتەیە.
گیلەرمۆ لاسۆ سەرۆكی ئیكوادۆر، لە كۆنگرەیەكی ڕۆژنامەوانیدا ئاماژەی بەوە كرد، كە ماوەی 60 ڕۆژ باری نائاساییان لە سیستەمی هەموو گرتووخانەكانی وڵات ڕاگەیاندووە.
لاسۆ باسی لەوە كرد، كە ژمارەی ئەو كەسانەی لە پێكدادانەكەی ناو گرتووخانەی لیتۆرال لە شاری گوایاكیل كوژراون گەیشتووەتە 116 كەس و ژمارەی بریندارانیش گەیشتووەتە 80 كەس.
وتیشی: ”یەكێك لە یەكەم هەنگاوەكانمان بۆ سەركەوتن بەسەر ئەم دیاردەیە، راگەیاندنی باری نائاسایی بوو لە گرتووخانەكانی سەرانسەری وڵاتدا”.
لاسۆ ئاماژەی بەوەیش كرد كە بە هاوهەڵوێستی لەگەڵ كەسوكاری زیندانیان كار دەكەن بۆ پاراستنی مافەكانیان و، رایگەیاند: “بەهۆی دووبارەبوونەوەی توندوتیژی لە گرتووخانەكاندا، ماوەی چەند مانگێكە حكوومەت رێوشوێنەكانی چاودێریكردنی ناو گرتووخانەكانی توندتر كردووەتەوە”.
پێكدادانەكە لە نێوان دوو گروپی تاوانكاری ركابەردا روویداوە، كە لەسەر دۆسیەی بازرگانی بە ماددەی هۆشبەر گیراون و تیایدا جۆرەها چەك لەوانە نارنجۆك بەكارهێنراوە.
پۆلیسی ئیكوادۆر دوای زیاتر لە 24 كاتژمێر توانیویەتی بارودۆخەكە كۆنتڕۆڵ بكات.
لە مانگی شوباتی ئەمساڵیشدا بە هۆی پێكدادان لە گرتووخانەیەكی ئیكوادۆر نزیكەی 80 كەس كوژرابوون.
