بەرپرسێكی وەزارەتی پلاندانانی عێراق ئاشكرای كرد، رۆژانە عێراقییەكان بەبڕی یەك ملیۆن و 800 هەزار دۆلار جگەرە دەكێشن، هەروەها نزیكەی 14 ملیۆن جگەرە كێش لە هەردوو رەگەز لە عێراقدا هەیە.
سەرچاوەكانی هەواڵی عێراقی لە زاری بەرپرسێكی وەزارەتی پلاندانانەوە بڵاویان كردووەتەوە، حكومەت پلانی ئەوەی هەیە كۆت و بەند لەسەر هاوردە كردنی جگەرە دابنێت، لەوانەش بەرز كردنەوەی بڕی باجی سەپێنراو.
رونیشیكردووەتەوە، ئەو كارەش سەختە چونكە بە چەندین رێگەی نایاسایی جگەرە لە چەندین دەوڵەتەوە هاوردە دەكرێت، لەوانەش “ئێران، توركیا و سوریا”، بەپێی راپۆرتەكانیش بەشێك لە جگەرە و توتن لە لوبنانەوە هاوردە دەكرێن ئەویش لە رێگەی قاچاخچێتییەوە، ئەویش بۆ سودوەرگرتنە لەو جیاوازی دراوەی هەیە.
بەرپرسەكەی وەزارەتی پلاندانان باسی لەوەش كردووە، گفتوگۆكان لەسەر ئەوەن لە پرۆژە یاسای بودجەی 2022دا باج لەسەر هاوردەكردنی جگەرە زیاد بكرێت، بەپێی داتاكان 35%ی عێراقییەكان لە هەردوو رەگەزی نێر و مێ جگەرە دەكێشن، ئەوەش واتای ئەوەیە لە كۆی 41 ملیۆن عێراقی 14 ملیۆنی جگەرە كێشن.
