بافڵ تاڵەباتی گەیشتە گردی زەرگەتە

وەفدێكی یەكێتی نیشتمانی بە سەرۆكایەتی بافڵ تاڵەبانی هاوسەرۆكی یەكێتی گەیشتە گردی زەرگەتە مەكۆی سەرەكی بزوتنەوەی گۆڕان لە شاری سلێمانی.

كۆبونەوەی نێوان وەفدی یەكێتی‌و عومەر سەید عەلی رێكخەری گشتی بزوتنەوەی گۆڕان لە ماڵەكەی نەوشیروان مستەفا لە گردی زەرگەتە بەڕێوەدەچێت، چونكە ئەمڕۆ بینای سەرەكی بزوتنەوەی گۆڕان قەرەباڵغە‌و كۆبونەوە دەكرێت لەبارەی رێوشوێنەكانی دوای شكستهێنانی گۆڕان لە هەڵبژاردنی پێشوەختەی عێراق.

سەردانی بافڵ تاڵەبانی بۆ گردی زەرگەتە لەكاتێكدایە، جڤاتی نیشتمانی بزوتنەوەی گۆڕان كۆدەبێتەوە بۆ بڕیاردان لەسەر چارەنوسی عومەر سەید عەلی رێكخەری گشتی بزوتنەوەكەو ئەندامانی خانەی راپەڕاندن.

بەپێی زانیارییەكانی (درەو)، ئەندامانی خانەی راپەڕاندن ئامادەییان نیشانداوە دەستلەكاربكێشنەوە، بەڵام رێكخەری گشتی داوا دەكات بەمە بەپێی پەیڕەوی ناوخۆ بكرێت‌و بەدیلی دەستلەكاركێشانەوەی ئەوان لە پۆستەكانیان دیاری بكرێت، بەم هۆیەوە هێشتا جڤاتی نیشتمانی هیچ بڕیارێكی نەداوە.

بۆ هەڵبژاردنی پێشوەختەی عێراق، بزوتنەوەی گۆڕان لەچوارچێوەی هاوپەیمانێتییەكدا لەگەڵ یەكێتی بەناوی “هاوپەیمانی كوردستان” بەشداری هەڵبژاردنی كرد، بەڵام توشی پاشەكشێیەكی مێژوویی هات‌و هیچ كورسییەكی پەرلەمانی عێراقی نەبردووە.ئەم ئەنجامە خراپە، ناڕەزایەتی لەناو لایەنگرانی گۆڕان دروستكردووە‌و داوای دەستلەكاركێشانەوەی رێكخەری گشتی‌و خانەی راپەڕاندن دەكەن، گلەییان لە هاوپەیمانێتییەكەیان هەیە لەگەڵ یەكێتی‌و دەڵێن هاوپەیمانێتییەكە هیچ سودێكی بۆ گۆڕان تێدا نەبووە.

سەرباری ناڕەزایەتییەكان لەناو بزوتنەوەی گۆڕانەوە، هێشتا بەرپرسانی باڵای یەكێتی چاویان لەوەیە لەگەڵ بزوتنەوەی گۆڕان درێژە بە هاوپەیمانێتییەكەیان بدەن‌و ئێستا بۆ هێوركردنەوەی ناڕەزایەتییەكانی گۆڕان باس لەوە دەكەن، سەرباری ئەوەی گۆڕان هیچ كورسییەكی پەرلەمانی نەبردوەتەوە، بەڵام یەكێتی بەو كورسییانەی كە مسۆگەری كردووە، هەر پۆستێك لە بەغداد وەربگرێت لەگەڵ بزوتنەوەی گۆڕان دابەشی دەكات، بەڵام رەنگە ئەمجارە پۆست دادی ناڕەزایەتییەكانی ناو بزوتنەوەی گۆڕان نەدات، بەتایبەتیش لەكاتێكدا فشارەكان توندبونەتەوە بە ئاڕاستەی ئەوەی گۆڕان لە حكومەتە خۆجییەكان‌و حكومەتی هەرێمی كوردستانیش بكشێتەوە‌و سەرلەنوێ‌و لەسەر شێوازی پێشتری خۆی وەكو ئۆپۆزسیۆن تێهەڵچێتەوە.