سەرۆك كۆمارو سەرۆكی ئەنجومەنی باڵای دادوەری لە عێراق رایدەگەیەنن كە پێویستە ئەو ناڕەزایەتییانەی لەسەر بەڕێوەچونی پڕۆسەی هەڵبژادن هەن، بەپێی دەستورو یاسا یەكلایی بكرێنەوەو بەگرنگیشی دەزانن ئەو سكاڵاو تانانەی لەسەر پڕۆسەكە هەن بە پیشەیی و بێلایەنی، رەچاوبكرێن و داواش لە هەمو لایەنەکان دەکەن پابەندبن بە دورکەوتنەوە لە ئاڵۆزکردنی دۆخەکە کە دور نییە کاریگەری لەسەر ئاشتی و ئاسایشی گشتی بکات.
بەرھەم ساڵح ، سەرۆک کۆمارو دادوەر فایەق زێدان، سەرۆکی ئەنجومەنی باڵای دادوەری لە عێراق، لە راگەیەندراوێكی هاوبەشدا باسیان لەوەکردوە”سەبارەت بەو ناڕەزاییانەی کە هەیە لەسەر بەڕێوەچونی پرۆسەی هەڵبژاردن جەخت لەسەر ئەوە دەکەینەوە کە لەچوارچێوەی یاسا جێی قبوڵکردنە، بۆیە مامەڵەکردن و یەکلاییکردنەوەی پێویستە بەپێی دەستور و یاسا دەبێت.”
ئەوەشیان خستۆتەڕو”ھاوکات پشتیوانی خۆمان بۆ کۆمسیۆنی هەڵبژاردنەکان و دەسەڵاتی دادوەری تایبەت بەو بابەتە دوپاتدەکەینەوە بۆ بەدواداچون بۆ ئەو دۆسیەیە، ھەروەھا جەختدەکەینەوە لەگرنگی رەچاوکردنی هەمو ئەو سکاڵاو تانانەی کە بەرزکراوەتەوە لەسەر پرۆسەی هەڵبژاردن بە پیشەیی و بەرپرسیارێتی و بێلایەنی تەواو.”
سەرۆككۆمارو سەرۆكی ئەنجومەنی باڵای دادوەری، داواشیان لە هەمو لایەنەکان كردوە “بەرپرسیارێتی نیشتمانی و بەرژەوەندییە باڵاکانی وڵات لەبەرچاو بگرن و پابەندبن بە پاراستنی ئارامی و زمانی عەقڵ و دورکەوتنەوە لە ئاڵۆزکردنی دۆخەکە کە دور نییە کاریگەری لەسەر ئاشتی و ئاسایشی گشتی بکات.”
