وەزارەتی نەوتی عێراق رایگەیاند، وەزیری نەوت داوای لە وەزیری سامانە سروشتییەكانی هەرێم كردووە زیاتر شەفافبن لە دۆسییەی نەوتدا.
نوسینگەی وەزیری نەوتی عێراق راگەیەنراوێكی بڵاوكردەوە و تیایدا هاتووە، كەمال ئەتروشی وەزیری سامانە سروشتییەكانی هەرێم بە سەردانێك گەیشتووەتە بەغدا و لەگەڵ ئیحسان عەبدولجەبار وەزیری نەوتی عێراق كۆبووەتەوە.
بەگوێرەی راگەیەنراوەكە، لە كۆبوونەوەكەدا گفتوگۆ كراوە لەبارەی هاریكاری نێوان هەرێم و حكومەتی فیدڕاڵی لە دۆسییەی نەوتدا.
ئاماژە بەوەشكراوە، وەزیری نەوتی عێراق داوای لە وەزیری سامانە سروشتییەكانی هەرێم كردووە، دەبێت هەرێم زیاتر شەفافبێت لە دۆسییەی نەوت و ئەو داهاتەی دەستی دەكەوێت.
لە راگەیەنراوەكەدا ئەوەشخراوەتەڕوو، كە وەزیری نەوتی عێراق داوای كردووە هەولێر و بەغدا زیاتر هاریكاری یەكتربكەن و پێكەوە كاربكەن بە ئامانجی وەبەرهێنانی دەرامەتە سروشتییەكان و هایدرۆكاربۆن لەسەرتاسەری عێراقدا لە پێناو بەهێزكردنی ئابوری نیشتیمانی.
ئیحسان عەبدولجەبار جەختیكردووەتەوە لەسەر پێویستبوونی زیادكردنی پرۆژەكانی وەبەرهێنان لەبواری غاز و وزەی پاك لەسەرجەم پارێزگاكاندا، بە ئامانجی زیادكردنی بەرهەمھێنان و كاركردن لەسەر كەمكردنەوەی بەرهەمهێنان و فڕێدانی گازی زیانبەخش بە ژینگە.
پێشتر وەزیری سامانە سروشتییەكانی هەرێم رایگەیاندبوو، لە سەردانەەیدا بۆ بەغدا پرسی ناردنی نەوتی سپی و بەنزین لە بەغداوە بۆ هەرێم تاوتوێ دەكەن.
