د.هێرش سەید سەلیم جێگری بەڕێوەبەری تەندروستی سلێمانی دەڵێت، بەم شێوەیەی ئێستا بڕوات لەوانەیە نەتوانن تا كۆتایی ساڵ سەرجەم فەرمانبەران بە ڤاكسینی كۆرۆنا بكوتن و رەنگە قەیرانی ڤاكسین دروست ببێت.
د.هێرش سەید سەلیم بە دەنگی ئەمریكای وتووە، ئەگەر بەمشێوەیەی ئێستا ڤاكسین دابین بكرێت و هەر لەبەغدادەوە بێت و حكومەتی هەرێم خۆی دەست نەكات بە كڕینی رەنگە قەیرانی ڤاكسین دروست ببێتەوە.
وتوشیەتی، پێویست دەكات وەزارەتی تەندروستی و ئەو لیژنەیەی دانرابوون بۆ كڕینی ڤاكسین رونكردنەوە بدەن، چونكە هەروەك دەزانرێت لەسەرەتای سەرهەڵدانی ڤاكسین حكومەتی هەرێم بانگەشەی كرد كە بودجەیەكی تایبەتی بۆ كڕینی ڤاكسین تەرخانكردووە، بەداخەوە تا ئێستا هیچ سەرەداو و رونكردنەوەیەك دیار نیە لەو لیژنەیەوە.
بەڕێوەبەری گشتی تەندروستی سلێمانی ئەوشی ئاشكرا كردووە، وەك تەندروستی سلێمانی زیاتر لە سەد هەزار ڤاكسینی عەمباركراویان هەیە، لەوەدەچێت تا مانگێكی تر ئەم كاتانە بگاتە دوو سەد هەزار، واتە تا كۆتایی ساڵ ئەگەر بەمجۆرە بێت دەتوانن 300 هەزار كەس بكوتن.
سەبارەت بە ژمارەی ئەو كەسانەی تاوەكو ئێستا لە سلێمانی بە ڤاكسین كوتراون وتویەتی، بۆ بابەتی بەرگری گشتی كاتێك دروست دەبێت كە رێژەی كوتان بگاتە لە %40، بەڵام تاوەكو ئێستا لە سلێمانی نەگەیشتونەتە %15، بۆیە دەبێت زەمینەسازی بكرێت، ئەم شێوازی ناچاركردنەی خەڵك بۆ وەرگرتنی ڤاكسین رێگایەكی گونجاوە چونكە ئێستا هەموو جیهان پەیوەندی هەیە بە بابەتی ڤاكسینەوە.
