حازم گۆران بەڕێوەبەری گشتی خانەنشینی هەرێمی كوردستان لە وەزارەتی دارایی و ئابوری رایگەیاند، ئەوكەسانەی دوو موچەیان هەیە، مانگانە بڕە پارەیەكیان لێ دەبڕدرێت، تاوەكو ئەو بڕە پارەیەی لەئەستۆیانە دەگەڕێندرێتەوە.
حازم گۆران لە لێدوانێكی رۆژنامەوانیدا ئاشكرایكرد، ئەو كەسانە تاوەكو 1ی 7ی 2020 دوو موچەیان وەرگرتووە پارەكەیان لێوەرناگیرێتەوە، بەڵام لەدوای ئەو بەروارە كە یاسای چاكسازی چووەتە بواری جێبەجێكردنەوە پارەی ئەو موچانەیان لێوەردەگیرێتەوە كە بە نایاسایی وەریان گرتووە و مانگانە یەك لەسەر پێنجی موچەكیان دەبڕدرێت.
بەرپرسەكەی وەزارەتی دارایی هێمای بۆئەوەشكرد، بە پێی رێنوێنی دارایی ژمارە 13 كە بۆ ئەو كەسانە دەرچووە دوو موچەیان هەیە، موچەیەك هەڵدەبژێرێت و بەڵێننامەیەك پڕ دەكاتەوە و موچەكەی تری دەبڕدرێت.
باسی لەوەش كردووە، ئەو بابەتە تەنیا خانەنشینان ناگرێتەوە بەڵكو ئەو فەرمانبەرانەش دەگرێتەوە دوو موچەیان هەبێت، زیاتر لە 10 هەزار دوو موچەیی هەیە بەڵام هەمووی ناچێتە چوارچێوەی دوو موچەیی و هەیە هەردوو موچەكەی یاساییە.
