وەزارەتی نەوتی عێراق ئاماری مانگی ئەیلولی هەناردەی نەوتی راگەیاند و بەپێی ئامارەكە داهاتی ئەو مانگە نزیكەی 7 ملیار دۆلار بووە.
وەزارەتی نەوتی عێراق لە بەیاننامەیەكدا بڵاویكردووەتەوە، لە مانگی ئەیلولی رابردودا بڕی 92 ملیۆن و 422 هەزار و 485 بەرمیل نەوتی خاو هەناردە كراوە، داهاتی ئەو بڕە نەوتەش 6 ملیار و 777 ملیۆن و 134 هەزار دۆلار بووە.
بەپێی بەیاننامەكە، نەوتی هەناردەكراو 89 ملیۆن و 244 هەزار و 254 بەرمیلی لە كێڵگە نەوتیەكانی باشور و ناوەڕاستی عێراقەوە بووە و دوو ملیۆن و 922 هەزار و 857 بەرمیلیشی لە كێڵگە نەوتیەكانی كەركوك و لە رێگەی بەندەری جەیهانی توركیەوە بووە، هەروەها 275 هەزار و 274 بەرمیلیش هەناردەی ئەردەن كراوە.
سەبارەت بە نرخی هەر بەرمیلێك نەوتی خاو وەزارەتەكە هێمای بۆ ئەوە كردووە، تێكڕای نرخی یەك بەرمیل نەوت 73 دۆلار و 32 سەنت بووە و نەوتی عێراق بە 34 كۆمپانیای جیاواز فرۆشراوە.
